“Toshkent shahrida Amerika texnologiyalar universitetini tashkil etish chora-tadbirlari to‘g‘risida”gi prezident qarori qabul qilindi.
![](/static/2024/07/18/photo_2022-05-19_15-59-23-HakQGLqQ.jpg)
Qarorga ko‘ra, muhandislik, sog‘liqni saqlash, axborot texnologiyalari, arxitektura va dizayn, iqtisodiyot va moliya, xalqaro munosabatlar sohalari uchun oliy maʼlumotli kadrlarni xalqaro standartlar darajasida tayyorlash universitetning asosiy faoliyat yo‘nalishlaridan biri etib belgilan.
Universitet nodavlat oliy taʼlim tashkiloti hisoblanadi hamda o‘z faoliyatini 2024/2025-o‘quv yilidan amalga oshiradi. Talabalarni o‘qitish to‘lov-kontrakt asosida amalga oshiriladi hamda qabul parametrlari va talabalarni o‘qitish uchun to‘lov-kontrakt summasi universitet tomonidan belgilanadi.
Abituriyentlar qabuli va bitiruvchilar attestatsiyasi universitet tomonidan belgilangan talab va tartibga muvofiq amalga oshiriladi.
Universitet bitiruvchilariga Arizona davlat universitetining yoki AQSHda tan olinadigan hamkor xorijiy oliy taʼlim tashkiloti diplomi beriladi. Bunda, bitiruvchilarga berilgan diplom O‘zbekistonda tan olinadi.
Qo‘shma taʼlim dasturlarining xorijiy universitetda o‘qish qismini bakalavriatda “3+1”, magistraturada “1+1” va boshqa shaklda, jumladan, masofaviy tarzda amalga oshirish imkoniyati yaratiladi.
Universitet to‘liq akademik, moliyaviy va tashkiliy mustaqil OTM hisoblanadi.
- Toshkentda Amerika texnologiyalar universitetini ochish rejasi 2023-yilning sentyabrida Shavkat Mirziyoyev hamda Cintana ta’lim kompaniyasi asoschisi va raisi Duglas Bekker o‘rtasida o‘tgan uchrashuvda muhokama qilingandi.
- Davlat rahbari bu rejani maʼqullab, O‘zbekiston taʼlim sohasidagi loyihalarni amalga oshirish uchun qulay sharoitlar yaratishga tayyorligini bildirgandi.
- Prezident 2024-yil 15-iyul kuni davlat oliy ta’lim muassasalariga qabul jarayonlari, oliy ta’lim tizimida sifatni oshirish va xalqaro o‘quv dasturlarini tatbiq etishga oid hisobot bilan tanishganida shu masalaga to‘xtalib o‘tib, bu boradagi tashkiliy chora-tadbirlar va kelgusi maqsadlar belgilab olindi.
Izoh (0)