BRIKSning “antiamerikancha siyosatini” qo‘llab-quvvatlagan davlatlarga AQSH tomonidan 10 foizlik qo‘shimcha boj solinadi. Bu haqda prezident Donald Tramp o‘zining Truth Social sahifasida ma’lum qildi.
AQSH prezidenti bunda “hech qanday istisnolar bo‘lmaydi” deya ta’kidladi. Tegishli bayonot Braziliyada bo‘lib o‘tayotgan BRIKS sammiti fonida yangradi. Sammit davomida BRIKS davlatlari Eron hududiga uyushtirilgan zarbalarni va Isroilning G‘azo sektoriga hujumini qoralagan deklaratsiyani qabul qildi. Hujjatda AQSH nomi bevosita tilga olinmagan.
Bundan oldin Tramp BRIKS davlatlari o‘z valyutasini dollarga muqobil sifatida joriy qilsa, ularning mahsulotlariga 100 foizlik boj solish bilan tahdid qilgandi.
BRIKSning xalqaro savdoda AQSH dollarini almashtirishi uchun hech qanday imkon yo‘q. Kimki bunday urinsa, Amerikaga xayr deb qo‘l siltaydi, degan edi Tramp.
2022-yilda Rossiya prezidenti Vladimir Putin BRIKS davlatlari o‘rtasida “xalqaro zaxira valyutasini” yaratish niyatini bildirgan. Biroq bu tashabbusga a’zolar hali tayyor emasligini tan olgan. Trampning tahdididan so‘ng Kreml dollarga muqobil yaratish masalasi muhokama qilinmayotganini ma’lum qildi va ekspertlarga Oq uy rahbariga “BRIKS kun tartibi”ni “batafsil” tushuntirishni tavsiya etdi. Tramp esa o‘sha vaqtdan beri BRIKS’ni “o‘lik” tashkilot deb atab keladi.
BRIKS dastlab 2001-yilda “BRIC” nomi ostida iqtisodiy tushuncha sifatida ilgari surilgan bo‘lib, 2009-yilda Braziliya, Rossiya, Hindiston va Xitoy tomonidan rasmiy siyosiy hamkorlik formati sifatida shakllantirildi. 2011-yilda bu guruhga Janubiy Afrika Respublikasi qo‘shilib, nomi “BRICS”ga aylandi. 2023-yil avgustidagi sammitda Misr, Efiopiya, Eron va Birlashgan Arab Amirliklari a’zolikka taklif qilindi va ular 2024-yil 1-yanvardan rasmiy a’zolarga aylandi. Shuningdek, 2025-yil boshida tashkilotga Indoneziya qo‘shildi.
Izoh (0)