БРИКСнинг “антиамериканча сиёсатини” қўллаб-қувватлаган давлатларга АҚШ томонидан 10 фоизлик қўшимча бож солинади. Бу ҳақда президент Дональд Трамп ўзининг Truth Social саҳифасида маълум қилди.
АҚШ президенти бунда “ҳеч қандай истиснолар бўлмайди” дея таъкидлади. Тегишли баёнот Бразилияда бўлиб ўтаётган БРИКС саммити фонида янгради. Саммит давомида БРИКС давлатлари Эрон ҳудудига уюштирилган зарбаларни ва Исроилнинг Ғазо секторига ҳужумини қоралаган декларацияни қабул қилди. Ҳужжатда АҚШ номи бевосита тилга олинмаган.
Бундан олдин Трамп БРИКС давлатлари ўз валютасини долларга муқобил сифатида жорий қилса, уларнинг маҳсулотларига 100 фоизлик бож солиш билан таҳдид қилганди.
БРИКСнинг халқаро савдода АҚШ долларини алмаштириши учун ҳеч қандай имкон йўқ. Кимки бундай уринса, Америкага хайр деб қўл силтайди, деган эди Трамп.
2022 йилда Россия президенти Владимир Путин БРИКС давлатлари ўртасида “халқаро захира валютасини” яратиш ниятини билдирган. Бироқ бу ташаббусга аъзолар ҳали тайёр эмаслигини тан олган. Трампнинг таҳдидидан сўнг Кремль долларга муқобил яратиш масаласи муҳокама қилинмаётганини маълум қилди ва экспертларга Оқ уй раҳбарига “БРИКС кун тартиби”ни “батафсил” тушунтиришни тавсия этди. Трамп эса ўша вақтдан бери БРИКСъни “ўлик” ташкилот деб атаб келади.
БРИКС дастлаб 2001 йилда “BRIC” номи остида иқтисодий тушунча сифатида илгари сурилган бўлиб, 2009 йилда Бразилия, Россия, Ҳиндистон ва Хитой томонидан расмий сиёсий ҳамкорлик формати сифатида шакллантирилди. 2011 йилда бу гуруҳга Жанубий Африка Республикаси қўшилиб, номи “BRICS”га айланди. 2023 йил августидаги саммитда Миср, Эфиопия, Эрон ва Бирлашган Араб Амирликлари аъзоликка таклиф қилинди ва улар 2024 йил 1 январдан расмий аъзоларга айланди. Шунингдек, 2025 йил бошида ташкилотга Индонезия қўшилди.
Изоҳ (0)