AQSH prezidenti Donald Tramp 2004-yildan beri amalda bo‘lgan Suriyaga qarshi iqtisodiy sanksiyalarni bekor qilish to‘g‘risidagi farmonni imzoladi. Bu haqda BBC xabar berdi.
Oq uy Suriyaga nisbatan sanksiyalarining bekor qilinishini “barqarorlik va tinchlik sari qadam” deya baholagan.
“Qo‘shma Shtatlar qo‘shnilari bilan barqaror, birlashgan va tinch davlat Suriyani qo‘llab-quvvatlaydi. Terrorchi tashkilotlarga xavfsiz boshpana bermaydigan, o‘zining diniy va etnik ozchiliklari xavfsizligini ta’minlaydigan birlashgan Suriya mintaqaviy xavfsizlik va farovonlikni ta’minlaydi”, deyiladi farmonda.
Rossiyaga qochib o‘tgan Suriya sobiq prezidenti Bashar Asad, uning oila a’zolari va ag‘darilgan rejim tarafdorlariga qarshi sanksiyalar amalda qolmoqda.
Tramp Suriyaning yangi rahbari Ahmad ash-Shara’a bilan 14-may kuni Ar-Riyodda uchrashgan edi. U uchrashuvdan oldin Suriyaga qo‘yilgan sanksiyalarni bekor qilishini aytgan. Oq uy esa Suriyaning yangi hukumati harakatlarini, jumladan, “Isroil bilan munosabatlarni normallashtirish qadamlarini” kuzatib borishini ma’lum qilgan.
Suriya tashqi ishlar vaziri Asad ash-Shiboniyning aytishicha, sanksiyalarning bekor qilinishi Suriyaning iqtisodiy tiklanishi yo‘lidagi to‘siqlarni olib tashlaydi va mamlakatni xalqaro hamjamiyat uchun ochadi. AQSH moliya vaziri Skott Bessent o‘z bayonotida sanksiyalarni yumshatish to‘g‘risidagi buyruq Suriya xalqiga “shafqatsiz Asad rejimi ag‘darilganidan keyin hayotni yangidan boshlash imkoniyatini” berishini aytgan.
“Bugungi harakatlar Suriya iqtisodiyotini jahon savdosiga birlashtirish va mamlakat infratuzilmasini qayta qurishga yordam beradi”, degan Bassent.
Izoh (0)