Samarqandda inspeksiya bosh mutaxassisi pora bilan qo‘lga olindi, deb xabar bermoqda DXX.
Ma’lum qilinishicha, texnik jihatdan tartibga solish sohasida nazorat inspeksiyasining Samarqand viloyati bo‘limi bosh mutaxassisi Paxtachi tumanidagi MCHJlardan biriga qarashli g‘isht zavodida nazorat tekshiruvini amalga oshirish vaqtida aniqlangan kamchiliklarni bo‘rttirib, go‘yoki 226 mln so‘mlik sifatsiz g‘isht mahsulotlari ishlab chiqarilgan va realizatsiya qilinganini aytadi.
Keyin u o‘tkazilgan tekshiruv yuzasidan tuzishi lozim bo‘lgan bayonnomada ushbu 226 mln so‘m jarimani 25 mln so‘mgacha kamaytirish evaziga 3 000 AQSH dollari talab qiladi.
DXX xodimlari tomonidan o‘tkazilgan tezkor tadbirlar davomida bu bosh mutaxassis o‘z xizmat xonasida 2500 AQSH dollarini pora sifatida olgan vaqtida ashyoviy dalillar bilan ushlandi.
Hozirda ushbu mansabdor shaxsga nisbatan Jinoyat kodeksining 210-moddasi 2-qismi “v” bandi bilan jinoyat ishi qo‘zg‘atilib, qamoq ehtiyot chorasi qo‘llandi. Tergov harakatlari olib borilmoqda.
Pora olgan soliqchilar
Zangiota tumanida soliq inspeksiyasining sho‘ba boshlig‘i vazifasini bajaruvchi shaxs qurilish mollari ishlab chiqarishga ixtisoslashgan oilaviy korxonaning faoliyatiga rahnamolik qilish va 1 yil davomida tekshiruv o‘tkazmaslik evaziga 1200 dollar olgan vaqtida ashyoviy dalillar bilan ushlangandi.
Sirdaryo viloyati Soliq boshqarmasining soliq to‘lovchilarga xizmat ko‘rsatish bo‘limi bosh inspektori Guliston shahrida faoliyat yurituvchi uchta MCHJning soliq qarzlarini, ushbu MCHJlarni soddalashtirilgan tartibda bankrot deb topish yo‘li bilan bartaraf qilib berish evaziga 4 ming dollar olgan vaqtida ashyoviy dalillar bilan ushlangan.
Namangan viloyati Yangiqo‘rg‘on tumani soliq inspeksiyasi katta inspektori bog‘dorchilikka ixtisoslashgan fermer xo‘jalikning 2023 va 2024-yillar uchun yer solig‘idan aniqlangan 11 million 200 ming so‘m miqdoridagi qarzdorligini bartaraf qilib berish evaziga 7 million so‘m, shuningdek, ushbu fermer xo‘jalik rahbarining tanishiga tegishli noturar joyning mol-mulk va yer soliqlaridan bo‘lgan 55 million 100 ming so‘m qarzdorligini ham to‘liq bartaraf qilib berish evaziga 28 million so‘m talab qiladi. U talab qilingan jami 35 million so‘m pul mablag‘ini olgan vaqtida ushlangan.
Izoh (0)