AQSH Suriyadan qo‘shinlarini olib chiqib ketmoqchi — OAV

AQSH o‘z qoshinlarini Suriyadan to‘liq olib chiqish masalasini ko‘rib chiqmoqda. Bu haqda Foreign Policy xabar berdi.

Xabarga ko‘ra, hozircha bu masala bo‘yicha yakuniy qaror qabul qilingani yo‘q, ammo Mudofaa vazirligi va Davlat departamentidagi manbalar Oq uy missiya muddatini uzaytirishdan endi manfaatdor emasligini aytgan. Qo‘shinlarning olib chiqilishi “Islomiy davlat” uchun “sovg‘a” bo‘ladi.

“Terrorchi guruh sezilarli darajada zaiflashganiga qaramay, agar imkoniyat bo'lsa, Suriyada qayta tiklanishga tayyor”, — deyiladi xabarda.

Ta’kidlanishicha, Suriyada 900 ga yaqin AQSH askari bor va ular Suriya Demokratik kuchlari bilan birgalikda mamlakat shimoli-sharqida “Islomiy davlat” faoliyatini to‘sishda muhim rol o‘ynaydi.

• 24-yanvar kuni Iroq va Suriyada joylashgan AQSHning uchta harbiy bazasi shialarning “Iroq islomiy qarshilik harakati” tomonidan hujumga uchradi.
• Pentagon matbuot kotibi Patrik Rayderning 11-yanvar kuni maʼlum qilishicha, 2023-yil 17-oktyabrdan buyon AQSHning Iroq va Suriyadagi harbiy bazalariga qilingan hujumlar soni 130 taga yetgan. Shundan 53 tasi Iroq hududida, yana 77 tasi Suriya hududida sodir etilgan.
• Amerika Isroilni urushda qo‘llab-quvvatlashi fonida uning Yaqin Sharq davlatlarida joylashgan bazalariga hujumlar tez-tez sodir bo‘lmoqda.