AQSH Suriyadagi harbiy ishtirokini bosqichma-bosqich qisqartirib, u yerda faqat bitta harbiy bazani qoldiradi. Bu haqda AQSHning Anqaradagi elchisi va Suriya bo‘yicha maxsus vakili Tom Barrak ma’lum qildi.
Rejaga ko‘ra, AQSH Suriyadagi sakkiz harbiy bazasidan yettitasini, jumladan, sharqdagi Deyr az-Zor viloyatidagi bazalarni yopadi. Faoliyat faqat shimoli-sharqdagi Hasaka viloyatida qoladi. AQSH harbiy texnikasi va askarlari allaqachon boshqa joyga ko‘chirilayotgani ma’lum qilingan.
Biz bazalar sonini sakkiztadan beshtagacha, keyin esa uchtagacha qisqartirdik. Oxir-oqibat ularning sonini bittaga qisqartiramiz, dedi AQSH elchisi.
Amerika Suriyadagi harbiylari sonini ham qisqartirishni rejalashtirgan. Hozirda mamlakatda taxminan 2 000 nafar amerikalik askar bor. Kontingent qisqarishiga ISHIDga qarshi kurashda so‘nggi o‘n yil ichida erishilgan “sezilarli muvaffaqiyatlar” sabab qilib ko‘rsatilgan.
AQSH boshchiligidagi xalqaro koalitsiya 2014-yilda Suriyada ISHIDga qarshi kurash boshladi. Bugungi kunda esa ISHIDning faqat “qoldiqlar”i qolgani aytilmoqda. AQSH elchisi Suriya oldida “hali uzoq yo‘l” borligini, mamlakatda turli diniy va etnik guruhlarning “integratsiyasi” qiyin kechayotganini aytgan.
Biroq men hammasi amalga oshishiga ishonaman, deya qo‘shimcha qilgan AQSH maxsus vakili.
Asad rejimining ag‘darilishi
2024-yil oxirida Suriyadagi “Hay’at Tahrir ash-Shom” guruhi boshchiligidagi qurolli kuchlar mamlakatning yirik shaharlarini, jumladan poytaxt Damashqni egallab, prezident Bashar Asad rejimini ag‘darishga erishdi. U va otasi Suriyani ellik yildan ortiq boshqargan edi. Asad oilasi bilan Rossiyaga qochib ketdi.
“Hay’at Tahrir ash-Shom”ning sobiq rahbari Ahmad ash-Shar’a Suriyaning yangi prezidenti ettib tayinlandi. U G‘arb mamlakatlari bilan munosabatlarni yaxshilashni boshlamoqchi ekanini bildirdi. AQSH va Yevropa Ittifoqi may oyida “mamlakatlardagi siyosiy o‘zgarishlarni qo‘llab-quvvatlash maqsadida” Suriyaga qarshi sanksiyalarning bir qismini bekor qila boshladi.
Izoh (0)