AQSH prezidenti Donald Trampning “tug‘ilgan asosida fuqarolik“ berishni cheklovchi farmoni vaqtincha to‘xtatildi. Bu haqda Associated Press xabar berdi.
Nyu-Xempshir shtatidagi federal sudya Jozef Laplant ushbu farmonning amal qilishini to‘xtatib turishga qaror qildi. Da’vo homilador ayol, ikki ota-ona va ularning chaqaloqlari nomidan kiritilgan.
U Trampning AQSHda noqonuniy yoki vaqtincha yashovchi ota-onalardan tug‘ilgan bolalarni fuqarolikdan mahrum qilish haqidagi yanvar oyidagi farmoniga qarshi qaratilgan. Da’vogarlarni Amerika fuqarolik erkinliklari ittifoqi (ACLU) va boshqa huquq tashkilotlari himoya qilmoqda.
Masala AQSH Konstitutsiyasining 14-tuzatishiga borib taqaladi. Unda quyidagicha yozilgan:
“Qo‘shma Shtatlarda tug‘ilgan yoki naturalizatsiya qilingan va uning yurisdiksiyasi ostida bo‘lgan barcha shaxslar AQSH fuqarolaridir”
Tramp ma’muriyati bu banddagi “uning yurisdiksiyasiga bo‘ysunadigan” degan ibora AQSH hududiga noqonuniy kirgan ayollardan tug‘ilgan chaqaloqlarga fuqarolik bermaslik huquqini beradi, deb hisoblaydi. Bu esa bir asrdan ortiq davomida amal qilib kelayotgan qonuniy tamoyilga ziddir.
Hukumat advokatlari fikricha, ilgari qabul qilingan talqinlar noqonuniy immigratsiyani rag‘batlantirgan va bu AQSHning suvereniteti, milliy xavfsizligi hamda iqtisodiy barqarorligiga putur yetkazgan.
Izoh (0)