AQSH prezidenti Donald Tramp 8-iyul kuni mis importiga 50 foiz, dori-darmonlarga esa 200 foiz boj solinishini ma’lum qildi. Bu haqda CNN xabar berdi.
Joriy etilishi rejalashtirilayotgan bu yangi tariflar qachon kuchga kirishi noma’lum.
“Endi navbat misga. Mis importiga 50 foiz boj joriy etamiz”, dedi Tramp Vazirlar mahkamasi yig‘ilishida.
Bu Tramp o‘zining ikkinchi prezidentlik muddati davomida joriy qilgan to‘rtinchi transchegaraviy boji hisoblanadi. Hozirda import qilinadigan aksariyat avtomobillar va avtomobil ehtiyot qismlari uchun 25 foizlik, po‘lat va alyuminiy uchun esa 50 foizlik tarif amal qilmoqda. AQSH prezidenti fevral oyida mis importi ustida tekshiruv o‘tkazish to‘g‘risida buyruq bergandi.
Mis turli xil tovarlar, jumladan, elektronika, mashina va avtomobillarning muhim tarkibiy qismidir. Unga qo‘yilgan bojlar bu turdagi tovarlarni amerikaliklar uchun qimmatroq qiladi. AQSH 2024-yili 17 milliard dollarlik mis import qilgan. U Chili metallining eng yirik xorijiy xaridori sanaldi. Chili 2024-yilda AQSHga 6 milliard dollarlik metall jo‘natgan.
Mis narxi Tramp ushbu qizil metallga boj joriy etishini aytganidan keyin 38 foizga ko‘tarilib ketgan. Nyu Yorkdagi mis fyucherslari 15 foizga oshib, bir funt uchun 5,68 dollarga yetgan. Ekspertlarning aytishicha, misdan foydalanadigan bizneslar uchun 50 foizlik boj juda katta soliq bo‘ladi.
Shuningdek, AQSH prezidenti 8-iyul kuni dori-darmonlarga “tez orada” 200 foizlik boj solinishi haqida ham e’lon qilgan. Ammo tarif ko‘proq farmatsevtika kompaniyalar AQSHga ko‘chirilmaguncha bir muncha vaqt kuchga kirmasligi aytilgan.
Birinchi prezidentlik davrida dori-darmonlar importini bojlardan ozod qilgan Tramp bir necha oydan beri bu mahsulotlarga tarif joriy etishga va’da berib kelmoqda. Biroq hozirgacha bu borada aniq choralar ko‘rilmagandi.
Prezidentning ta’kidlashicha, Qo‘shma Shtatlar dori-darmon ishlab chiqarishda boshqa mamlakatlar yordamiga tayanmasligi lozim. Shu bois ko‘proq mahalliy dori-darmon ishlab chiqarishga e’tibor qaratiladi.
Tramp 7-iyul kuni savdo bojlarini 1-avgustga qadar to‘xtatib turishini ma’lum qilgandi. Aprel oyida qisqa muddatga kiritilgan ushbu stavkalar 9-iyulda tiklanishi rejalashtirilgandi. Prezident, shuningdek, davlat rahbarlariga avgust oyidagi yangi tarif stavkalari qanday bo‘lishi haqida maktublar yo‘llamoqda.
Izoh (0)