Janubiy Koreyada bir necha kundan beri davom etayotgan kuchli yomg‘ir va suv toshqinlari oqibatida halok bo‘lganlarning soni 14 nafarga yetdi. Bu haqda BBC xabar berdi.
Mamlakatda favqulodda qutqaruv ishlari hali hamon davom etmoqda. 12 kishi bedarak yo‘qolgani haqida xabar qilingan. Shu sababli qurbonlar soni ortishi mumkinligi prognoz qilinmoqda.
Kurort shahar Gapyong ko‘chki tufayli deyarli vayron bo‘lgan. Hududdagi ko‘prikka jiddiy shikast yetgan. Chunchon provinsiyasining markaziy qismida ko‘chki oqibatida butun bir qishloq tuproq va chiqindilar bilan qoplangan.
Vayronagarchilikning katta qismi mamlakat janubida sodir bo‘lgan. Xususan, Sanchon provinsiyasida 6 kishi halok bo‘lib, 7 kishi bedarak yo‘qolgan. Minglab yo‘l va binolar suv ostida qolgan, ekin maydonlariga zarar yetib, chorva mollarining ko‘pi nobud bo‘lgan. Gapyon okrugi shimolida sodir bo‘lgan ko‘chki 2 kishini hayotdan olib ketgan.
Mahalliy ommaviy axborot vositalarining xabar berishicha, mamlakat bo‘ylab 16-iyul kuni yomg‘ir boshlanganidan beri 10 mingga yaqin odam o‘z uylarini tark etishga majbur bo‘gan. 41 mingdan ortiq xonadon esa vaqtincha elektr ta’minotidan uzilgan.
Izoh (0)