Shimoliy Koreyaning Chagang provinsiyasida yuz bergan suv toshqini oqibatlarining oldini ololmagan 30 nafargacha amaldor qatl etildi. Bu haqda Daily Star xabar berdi.
Provinsiyadagi suv toshqinlari va ko‘chkilar tufayli 4000 kishi halok bo‘lgan. Shimoliy Koreya rahbari Kim Chen In suv toshqinlaridan keyin inson o‘limi uchun amaldorlar jazolanishini aytgan.
Avgust oyi oxirida suv toshqinidan zarar ko‘rgan hududda 20-30 nafar mansabdor shaxs bir vaqtning o‘zida qatl etilgani aniqlangan. Huquqni muhofaza qilish organlari Chagang provinsiyasi partiya kotibi Kan Bon Xunni hibsga olgan.
U, shuningdek, o‘q-dorilar sanoati departamenti direktori o‘rinbosari lavozimida ishlagan, Kim Chen Inga ish vaqtida hamrohlik qilgan.
Shimoliy Koreyaning shimoli-g‘arbiy provinsiyalarida yuz bergan suv toshqinlarida minglab aholi boshpanasiz qoldi, ko‘plab odam halok bo‘ldi. Davlat ommaviy axborot vositalari kuchli yomg‘irlar 4100 ta uyni, 7410 gektar qishloq xo‘jaligi yerlari, ko‘plab administratsiya binolari hamda inshootlarni vayron qilgani haqida xabar berdi. Shuningdek, shimoli-g‘arbdagi Sinuyuju shahri va unga qo‘shni Uyju shahridagi yo‘llar yuvilib, temiryo‘llar suv ostida qoldi.
Shundan so‘ng Kim Chen In tabiiy ofatlarning oldini olish bo‘yicha o‘z vazifalarini e’tiborsiz qoldirgan amaldorlarni “qattiq jazolash”ni talab qilgandi.
Izoh (0)