Ijtimoiy tarmoqlarda Zominda chigirtka shunchalik ko‘pki, odam ustigacha chiqib ketyapti, mazmunida video tarqaldi. Qishloq xo‘jaligi vazirligi huzuridagi O‘simliklar karantini va himoyasi agentligi holatga izoh berdi.
Unda aytilishicha, ijtimoiy tarmoqlarda tarqalayotgan mazkur holat 11-iyun kuni tasvirga olingan. Jizzax viloyatining Zomin tumanida Karantin agentligining Chigirtka va tut parvonasiga qarshi kurash xizmati mexanizatori Haydar Musayev kimyoviy ishlov olib borilishidan oldin mahalla aholisiga tushuntirish ishlarini olib borgan.
Ayni vaqtda hudud zararsizlantirilib, chigirtkalar to‘dasi bartaraf etilgan.
Bildirilishicha, joriy yilda 608 ming gektar maydonda kimyoviy ishlov olib borilishi rejalashtirilgan bo‘lib, shundan 99 300 gektar Jizzax viloyatida o‘tkazilishi aytilgan. Har kuni respublika bo‘yicha taxminan 7-8 ming gektarda kimyoviy ishlov o‘tkazilmoqda.
Qayd etilishicha, vaziyat nazorat ostida. Mavsum boshidan buyon 1000 dan ortiq texnika, 650 nafardan ortiq ishchi xodim jalb etilib, kurash tadbirlari davom etmoqda.
Qozog‘iston, O‘zbekiston va Qirg‘iziston chigirtkalarga qarshi kurashish bo‘yicha kuchlarni birlashtirib, mintaqaviy xavfsizlikni ta’minlash yo‘lida hamkorlikni yo‘lga qo‘ymoqda.
O‘zbekistonda 2025-yilda 608 ming gektar maydonda chigirtka tarqalishi prognoz qilingan. Biroq iqlim o‘zgarishi, yil sayin havo haroratining oshib borayotgani zararli chigirtkalar maydoni kengayishiga olib kelishi mumkin. Chigirtka bosqini bilan bog‘liq barcha murojaatlarni o‘z vaqtida bartaraf etish maqsadida hududlarda tezkor shtablar tashkil etilib, chigirtka xizmati 24/7 rejimiga o‘tkazilgan.
Izoh (0)