Prezident Shavkat Mirziyoyev to‘rtinchi Toshkent xalqaro investitsiya forumida nutq so‘zladi. Bu haqda Prezident matbuot xizmati xabar berdi.
Davlat rahbari bugungi dunyo katta sinovlarni boshidan kechirayotganini taʼkidladi.
“Global xavfsizlik va barqaror rivojlanishga jiddiy tahdidlar tobora kuchaymoqda, geosiyosiy jarayonlar ko‘z o‘ngimizda shiddat bilan o‘zgarmoqda. Jahonda qurollanish poygasi yana avj olmoqda. Yirik mamlakatlarning harbiy xarajatlari 2010-yilga nisbatan bir yarim barobar ortib, 2,5 trillion dollarga yetdi. Iqtisodiy inqiroz asoratlari, moliyaviy resurslar taqchilligi tufayli jahon yalpi ichki mahsulotining o‘sish surʼatlari esa ketma-ket uch yil davomida pasaymoqda”, deydi O‘zbekiston prezidenti.
Shavkat Mirziyoyev xalqaro huquq normalari va diplomatiya kuchi zaiflashayotganini aytib o‘tdi.
“Eng achinarlisi, insoniyat uchun eng dolzarb muammolar – oziq-ovqat xavfsizligi, kambag‘allik, iqlim o‘zgarishlari kabi masalalarga eʼtibor kamaymoqda. Dunyoda tinchlik, adolat va inson qadriga bo‘lgan umumiy ishonchni tiklash har qachongidan ham muhim.
Biz Ukraina bilan bog‘liq vaziyatni faqat diplomatik yo‘llar bilan hal etish zarur, deb hisoblaymiz va Istanbulda bo‘lib o‘tayotgan to‘g‘ridan-to‘g‘ri muzokaralarni olqishlaymiz”, dedi O‘zbekiston yetakchisi.
Davlat rahbari o‘z nutqida ko‘pdan buyon cho‘zilayotgan G‘azo fojiasiga ham eʼtibor qaratdi.
“XXI asrda ko‘z o‘ngimizda ko‘plab begunoh insonlarning nobud bo‘layotganini hech nima bilan oqlab bo‘lmaydi. Bu muammoning yagona yechimi – nizoni xalqaro huquq meʼyorlari va qabul qilingan rezolyutsiyalar asosida adolatli hal qilishdir. Falastin xalqi o‘z mustaqil davlatiga ega bo‘lishga haqlidir.
Global kun tartibidagi yana bir masala – bu qo‘shni Afg‘onistonning tinch va barqaror rivojlanishiga ko‘maklashishdan iborat. Bu davlatning amaldagi hukumati bilan xalqaro maydonda konstruktiv muloqot olib borish, uning yakkalanib qolishiga yo‘l qo‘ymaslik har qachongidan ham muhim. Zero, mazkur mamlakatdagi osoyishtalik va iqtisodiy rivojlanish yon-atrofdagi barcha mintaqalarning uzoq muddatli taraqqiyoti uchun zarur omildir”, deydi Shavkat Mirziyoyev.
O‘zbekiston prezidenti ushbu muammolar bo‘yicha barcha sherik davlatlarni ochiq va keng ko‘lamli xalqaro hamkorlikka chaqishini aytdi.
“Chunki, forumning asosiy mavzusi bo‘lgan investitsiyalar – faqat iqtisodiy taraqqiyotning emas, balki tinchlik va barqarorlikning kafolatidir!
Keling, birgalikda shunday investitsiya muhitini yarataylikki, u daromad keltirish bilan birga, inson qadrini ulug‘laydigan, uning hayotiy manfaatlarini taʼminlaydigan va jamiyat ravnaqiga xizmat qiladigan mustahkam poydevorga aylansin!”, deya qo‘shimcha qildi Shavkat Mirziyoyev.
Izoh (0)