Ijtimoiy tarmoqlarda Boysundagi “Mustaqillikning 25 yilligi” gaz-kimyo majmuasiga qarashli 202-sonli quvurda texnik nosozlik sodir bo‘lgani haqida xabarlar tarqalgan edi. Holat yuzasidan Surxondaryo viloyati Ekologiya boshqarmasi matbuot xizmati izoh berdi.
Maʼlum qilinishicha, ushbu holat bo‘yicha mutasaddi idoralar vakillaridan iborat ishchi guruh tuzilgan. O‘rganish jarayonida 8-iyun kuni “Kofurun” MFYda jami 5 ta nuqtada, soat 08:00 dan 11:00 gacha turli o‘lchov uskunalari orqali atmosfera havosidagi vodorod sulfid (H₂C) gazi miqdori nazorat qilindi.
“Jumladan, avariya sodir bo‘lgan quduq atrofida (500 m), sharqiy, g‘arbiy va shimoliy yo‘nalishlarda 1000 m dan 3000 m gacha bo‘lgan masofalarda hamda Kofurun qishlog‘ida (1500 m) olib borilgan o‘lchov natijalariga ko‘ra, barcha nuqtalarda vodorod sulfid darajasi me‘yordan oshmagan”, deyiladi xabarda.
Qo‘shimcha qilinishicha, holat yuzasidan ishchi guruh tomonidan atmosfera havosini o‘rganish va monitoring qilish ishlari hududda doimiy ravishda olib boriladi.
Boysun konidagi avariya
- 2024-yil 1-sentyabr kuni soat 15:17 da Surxondaryo viloyati Boysun tumani “Ko‘lqamish” MFY hududida joylashgan “Mustaqillikning 25 yilligi” koniga qarashli 604-son qudug‘ida burg‘ilash ishlari olib borish vaqtida texnologik jarayonning buzilishi oqibatida oltingugurt (vodorod sulfid) gazi chiqishi kuzatilgan.
- Aholi xavfsizligini ta’minlash maqsadida kon yaqinida yashovchi fuqarolar xavfsiz hududga evakuatsiya qilingan. Prezident topshirig‘iga asosan bosh vazir o‘rinbosari Ochilboy Ramatov, favqulodda vaziyatlar vaziri Abdulla Qo‘ldoshev, energetika vaziri Jo‘rabek Mirzamahmudov, Surxondaryo viloyati hokimi Ulug‘bek Qosimov hamda “O‘zbekneftgaz” boshqaruv raisi Bahodir Siddiqov hodisa joyiga yetib borgan.
- 15-sentyabr kuni soat 16:50 da sizib chiqish to‘xtatilgan. Ammo mazkur konda 17-sentyabr kuni yana gaz chiqish holati yuz bergan. Yangi avariya oqibatida to‘rt kishi halok bo‘lgan.
Izoh (0)