Surxondaryo viloyatining Boysun tumanidagi “M-25” konidagi 202-sonli quduqda 27-mart kuni kechqurun soat 21 lar atrofida vodorod sulfidining nazorat ostidagi otilishi yuz berdi. Energetika vazirligining ma’lum qilishicha, tabiatga ziyon yetkazmaslik va havo ifloslanishining oldini olish maqsadida quduq yoqib qo‘yildi. Holat aks etgan video ijtimoiy tarmoqlarda tarqaldi.
Energetika vazirligiga ko‘ra, hodisa oqibatida hech kim jabrlanmagan. Voqea joyiga zudlik bilan Favqulodda vaziyatlar vazirligining brigadasi yetib borgan. Shuningdek, ishlarni tashkil etish maqsadida Energetika vazirligi hamda boshqa mutasaddi tashkilotlar tarkibida tashkil etilgan maxsus shtab vakillari ham hodisa joyiga yetib kelgan.
Ayni paytda kerakli barcha chora-tadbirlar zarur texnika hamda uskunalardan foydalanilgan holda olib borilmoqda. Shuningdek, xavfsizlikni taʼminlash bo‘yicha kuchaytirilgan choralar ko‘rilmoqda.
Alohida taʼkidlash lozimki, yuzaga kelgan mazkur holat aholi va yaqin atrofdagi hududlarga hech qanday xavf tug‘dirmaydi. Jarayon Favqulodda vaziyatlar vazirligi, “Sanoatkontexnazorat” davlat inspeksiyasi hamda Ochiq neft va gaz favvoralarining oldini olish va bartaraf etish bo‘yicha O‘zbekiston harbiylashtirilgan qismi mutaxassislari tomonidan to‘liq nazorat ostiga olingan, deyiladi vazirlik xabarida.
Ma’lum qilinishicha, hozirgi vaqtda ushbu vaziyat hamda yong‘inning kelib chiqishi sabablari o‘rganilmoqda. Bu haqdagi batafsil maʼlumot ishlar yakunlanganidan so‘ng maʼlum qilinadi.
Energetika vazirligi “M-25” gaz konini o‘zlashtirish jarayoni o‘ziga xos murakkablikka egaligi, bu yerda xalqaro tajribadan foydalanib, kuchaytirilgan nazorat choralari amalga oshirilayotganini eslatib o‘tdi.
Vodorod sulfid — bevosita asab tizimiga ta’sir qiluvchi zaharli gaz. U hid bilish nervini falaj qilish xususiyatiga ega, buning oqibatida odam bu gazning hidini sezmay qoladi. Bu ko‘pincha toksik manba bilan aloqani o‘z vaqtida aniqlash va to‘xtatish qobiliyatining yo‘qligi tufayli kuchli zaharlanishga olib keladi. Kam miqdordagi vodorod sulfidi bo‘lgan havodan nafas olish bosh aylanishi, bosh og‘rig‘i, ko‘ngil aynishi, qayt qilishga, yuqori konsentratsiya esa koma, tutqanoq, o‘pka shishi va o‘limga olib kelishi mumkin.
Izoh (0)