O‘zbekiston Respublikasi Prezidentining 2017-yil 7-avgustdagi farmoniga muvofiq, avgust oyining ikkinchi yakshanbasi Qurilish sohasi xodimlari kuni, deb e’lon qilingan va bu sana mamlakatimiz bo‘ylab keng nishonlanadi. 8-avgustda Enter Engineering kompaniyalari guruhining eng yirik uchta obyektida ushbu sanaga bag‘ishlangan tantanali tadbirlar bo‘lib o‘tdi. Samarqand, Qashqadaryo va Surxondaryo viloyatlari hokimliklari ko‘magida har bir obyekt ma’muriyati tomonidan bayram tadbirlarini yuqori darajada o‘tkazish bo‘yicha qator tayyorgarlik tadbirlari amalga oshirildi.
Bayram tadbirlari Sayyohlik markazi qurilishi maydonida (Samarqand viloyati, Samarqand tumani), “Mustaqillikning 25 yilligi” konida (Surxondaryo viloyati, Boysun tumani) hamda UzGtl Gtl texnologiyasi bo‘yicha sintetik yoqilg‘i ishlab chiqarish bo‘yicha zavodda (Qashqadaryo viloyati, G‘uzor tumani) bo‘lib o‘tdi.
Bayram tadbirlarida qurilayotgan obyektlarning ishchilari tomoshabin tarzida ishtirok etishdi. Ona diyorimizning tabiat ne’matlari bilan bezatilgan to‘kin bayram dasturxoni atrofidagi kechki taomdan so‘ng barcha ishchi xodimlar maydonga yig‘ildi va loyiha rahbarlarining tabrik nutqlarini tinglashdi. Tadbirda, shuningdek, mahalliy boshqaruv organlari, hokimliklar vakillari ham qatnashdi, barcha yig‘ilganlarni Qashqadaryo viloyati hokimi o‘rinbosari Tursunov Shuhrat Hamidovich, Surxondaryo viloyati hokimining qurilish ishlari bo‘yicha o‘rinbosari Xidirov Alisher Bo‘riyevich, Boysun tumani hokimi Asqarali Jo‘rayev va Samarqand tumani hokimi Mavlonov Nosir Mamarasulovich kasb bayrami bilan tabriklashdi.
Bayramga tashkilotchilar tomonidan maxsus taklif etilgan taniqli san’atkorlarning musiqali chiqishlari alohida fayz bag‘ishladi. Enter Engineering ishchilari safida ko‘plab xorijlik mutaxassislar ham ishlayotgani bois konsert dasturlarida dunyoning turli tillarida kuylanuvchi kuy-qo‘shiqlar ham ijro etildi. Bayram tadbirlari barcha obyektlarda sanitariya-epidemiologiya talablariga qat’iy rioya etilgan holda, yuksak darajada tashkillashtirildi. Quruvchilar kuniga bag‘ishlangan bayram tadbirlari barchaga ko‘tarinki kayfiyat bag‘ishladi, har bir quruvchi ishchi o‘z mehnatining ahamiyatini, jamoaviy ruhini his etdi.
Enter Engineering matbuot xizmati
Izoh (0)