Telegram’da ma’lumotlarning ishonchliligini tekshirish mexanizmi ishga tushdi. Bu haqda messenjer yangiliklariga ixtisoslashgan “Kod Durova”kanali ma’lum qildi.
Telegram vakillari yangilanish bo‘yicha rasmiy bayonot bermagan. Biroq We Ton Telegram kanalida messenjer Rossiyadan chiqib ketayotgani haqidagi xabar e’lon qilingach, post ostida Fact Check belgisi paydo bo‘lgan.
Mazkur post ostida ajratilgan alohida blokda, iqtibos ko‘rinishida, Telegram asoschisi Pavel Durov bunday bayonot bermagani ta’kidlangan. “Bu nima?” tugmasi bosilganda esa, mazkur tushuntirishning aynan Telegram tomonidan taqdim etilgani haqida bildirishnoma chiqadi.
Telegram’ning Android operatsion tizimi uchun beta-versiyasida “Faktlarni tekshirish” funksiyasi paydo bo‘lgani haqida “Kod Durova” 2024-yil may oyida ham xabar bergan edi. O‘shanda, ushbu funksiya doirasida Telegram ishonchli ma’lumotlarni taqdim etadigan agentliklar bilan hamkorlik qilishi, oddiy foydalanuvchilar esa faktcheking natijalariga ta’sir etmasligi aytilgan.
“Durov kodi”ning yozishicha, Telegram faoliyat yuritayotgan mamlakatlarda hukumatlar axborotni tekshirish bo‘yicha agentliklarni belgilash imkoniyatiga ega bo‘ladi.
Ma’lumot o‘rnida, shunga o‘xshash funksiya X (sobiq Twitter) ijtimoiy tarmog‘ida ham mavjud bo‘lib, u 2021-yilda ishga tushirilgan. Agar Telegram’da ma’lumotlarni tekshirish agentliklar tomonidan amalga oshirilsa, sobiq Twitter’da bu bilan “Hamjamiyat izohlari” dasturida ishtirok etuvchi moderatorlar shug‘ullanadi.
Izoh (0)