Telegram messenjeridagi kanallarda Qashqadaryo viloyatida bir vaqtning o‘zida 7 nafar YPX inspektori pora olgani uchun sudlangani va qamalgani haqida xabar berilgandi. Respublika Yo‘l harakati xavfsizligi xizmati matbuot kotibi Zoyir Yo‘ldoshev buni rad etib, sudlanganlar sobiq YPX inspektorlari ekaniga aniqlik kiritdi. “Daryo” sudlangan xodimlar qilmishi bilan qiziqdi.
Maʼlum bo‘lishicha, 2025-yilning 17-iyun kuni jinoyat ishlari bo‘yicha Koson tuman sudida sud raisi Fozil Yusupov boshchiligida o‘z vazifasini lozim darajada bajarmaslik evaziga pora olib kelgan IIB xodimlari ishi ko‘rib chiqilgan.
Sudda aniqlanishicha, Qashqadaryo viloyatida faoliyat yurituvchi to‘rt nafar YPX inspektori, bir nafar karantin tadbirlarini taʼminlash guruhi safdor xodimi va “Umakay” o‘simliklar karantini chegara maskani inspektori bilan til biriktirib, lozim darajadagi vazifasini bajarmay, evaziga pora olib kelgan.
Qayd etilishicha, bosh vazirning 2023-yil 27-sentyabrdagi xati asosida ichki ishlar vaziri hamda Qashqadaryo viloyati hokimi viloyat IIB boshlig‘iga qora metall parchalari va chiqindilarini noqonuniy sotib olish, ulardan foydalanish va sotishni bartaraf etish hamda viloyat hududidan noqonuniy chiqib ketilishining oldini olish bo‘yicha topshiriq bergan. Topshiriqqa asosan 2023-yil 17-iyulda Qashqadaryo viloyati IIB boshlig‘i, Bojxona boshqarmasi boshlig‘i va “O‘zmetkombinat” AJ “Qashqadaryo IQM” filiali boshlig‘i “Qashqadaryo viloyati hududida qora metall parchalari va chiqindilari noqonuniy aylanmasining oldini olish chora-tadbirlari” rejasini ishlab chiqqan.
Sudlangan IIB xodimlari mana shu rejada belgilangan vazifalariga bepisandlik qilib, viloyat hududida qora metall parchalari va chiqindilarining noqonuniy aylanmasi bilan shug‘ullanuvchi fuqaroning metallar ortilgan yuk mashinalarini tekshirmasdan, Ko‘kdala tumanidagi “Umakay” muntazam YPX maskanidan o‘tkazib yuborish bilan shug‘ullangan. Ular bu kabi ishlarni 2023-yilning oktyabr—dekabr oylarida amalga oshirib kelgan. Natijada har bir IIB xodimi xizmat haqi uchun davomli tarzda 100 ming so‘mdan 5 million so‘mgacha miqdorda pora olib kelgan.
Sud 6 nafar IIB xodimi ishini ko‘rib chiqib, ularning 3 nafariga 5 yil, qolgan uch nafariga esa 3 yil muddatga ozodlikdan mahrum qilish jazosini tayinladi.
Izoh (0)