Afg‘onistondagi qurg‘oqchilikka qaramay, ho‘l meva hosildorligi o‘tgan yilga nisbatan ikki baravar oshdi.
“Daryo” muxbiri Balx viloyatidagi meva bozorlarida bo‘lib, sotuvchi va xaridorlar bilan suhbatlashdi.
Afg‘oniston bozorlarida, ho‘l meva arzonligidan xaridorlar mamnun.
Mozori Sharif shahrida yashovchi Lutfulla meva sotib olish uchun bozorga kelgan, uning aytishicha, meva hech qachon bunchalik arzon bo‘lganini eslolmaydi.
Uning aytishicha, o‘tgan yillarda bir kilogramm o‘rik va shaftoli 100 afg‘oni bo‘lgan bo‘lsa, hozir bu mevalarning bir kilosi 20 afg‘oni sotilmoqda. Bu yil xalq uchun barakali yil bo‘ldi, deydi Lutfulla.
Uning so‘zlariga ko‘ra, ko‘pchilik o‘rik va shaftoli yetarlicha arzon bo‘lgani uchun sotib olmoqda.
Balx viloyatidagi do‘kondorlarning aytishicha, bu yil butun Balx viloyati tumanlarida mevali daraxtlarning hosildorligi oshgan va bu meva mahsulotlarining bir qismi hatto qo‘shni viloyatlarga ham eksport qilinyapti.
Ho‘l meva sotuvchi Niyoz Muhammad Muhammadiyning aytishicha, bu yil olma, olxo‘ri, o‘rik, shaftoli, qulupnay, gilos kabi ho‘l mevalarning hosildorligi o‘tgan yillarga nisbatan sezilarli darajada oshdi.
Uning aytishicha, avvallari Balx viloyati aholisi o‘zlariga zarur bo‘lgan meva va qishloq xo‘jaligi mahsulotlarini xorijiy davlatlar va qo‘shni viloyatlardan olib kelishgan, ammo hozir Balx viloyati ehtiyojlarini qondirish bilan birga, Afg‘onistonning boshqa viloyatlariga ham turli meva va qishloq xo‘jaligi mahsulotlarini eksport qilmoqda.
Balx viloyatidagi qator bog‘bonlarning aytishicha, yetarlicha sovuqxonaning yo‘qligi, issiq havo mevalarni arzon narxlarda sotishga majbur qilgan. Ayni paytda Balx viloyatida 23 ming gektar bog‘ maydoni mavjud bo‘lib, u yerda turli mevali daraxtlar yetishtiriladi.
Balx viloyati bozorlariga eng ko‘p meva yetkazib beruvchi tumanlar Chemtal, Chahar Bolak, Dehdadi, Samarqand va Chahar Sang tumanlaridir.
Bu tumanlarda aholining asosiy qismi dehqonchilik, bog‘dorchilik va chorvachilik bilan shug‘ullanadi.
Tumanlardagi eng muhim qishloq xo‘jaligi va daraxt ekinlari o‘rik, shaftoli, qulupnay, tarvuz, poliz ekinlaridir.
Afg‘oniston bozorida meva narxlari:
1 kg shaftoli — 20-50 afg‘oni
1 kg o‘rik — 20-50 afg‘oni
1 kg olxo‘ri — 20-50 afg‘oni
1 kg gilos — 80-200 afg‘oni
1 kg qulupnay — 100-150 afg‘oni
1 kg Eron apelsini — 100 afg‘oni
1 kg Misr apelsini —130-150 afg‘oni
1 kg Eron olmasi — 150-200 afg‘oni
1 kg afg‘oniston olmasi —100-150 afg‘oni
1 kg Braziliya olmasi — 250 afg‘oni
1 kg Xitoy olmasi — 200 afg‘oni
1 kg Xitoy noki — 150-180 afg‘oni
1 kg afg‘oniston noki — 200 afg‘oni
1 kg Hind banani — 80 afg‘oni
1 kg mango — 90 afg‘oni
1 kg qovun — 20-40 afg‘oni
1 kg tarvuz — 7-10 afg‘oni sotilmoqda.
Izoh (0)