“Tolibon” harakati Afg‘onistonning Daykundi viloyatida stol futbolini o‘ynashni taqiqladi. Ular o‘yindagi futbolchi figuralar butlarga o‘xshashini aytgan. Bu haqda Afghanistan International xabar berdi.
“Tolibon” stol futboli o‘yinini davom ettirish uchun klublarga shart qo‘ygan. Buning uchun futbolchi figuralarning bosh qismlari olib tashlanishi kerak. Bu ko‘rsatmaga rioya qilinmasa, o‘yinga to‘liq taqiq joriy etiladi. Hukumat bu bo‘yicha hali rasmiy bayonot bermagan.
So‘nggi to‘rt yil ichida “Tolibon” hukumati Afg‘onistonda turli sport va ko‘ngilochar o‘yinlarga nisbatan cheklovlarni kuchaytirgan. Ayrimlarini esa butunlay taqiqlab qo‘ygan. May oyida “Tolibon”ning sport bo‘yicha rasmiylari Afg‘oniston shaxmat o‘ynashni taqiqlab, uni “harom” deb atagandi.
Mazkur farmonni Afg‘oniston amiri shaxsan imzolagan, tashabbus esa Ezgu ishlarni targ‘ib qilish va yovuzlikning oldini olish vazirligi tomonidan ilgari surilgan.
9-may kuni afg‘onistonlik shaxmatchilar mamlakatdagi Sport va jismoniy tarbiya bo‘yicha departamentga murojaat qilib, shaxmat o‘ynashga ruxsat berishni, shuningdek, to‘garaklar va musobaqalar tashkil etish uchun moliyaviy yordam ajratishni so‘ragan. Biroq “Tolibon” rasmiylari buni bajarishdan bosh tortgandi.
Ta’kidlash kerakki, bu Afg‘onistonda shaxmat ilk bor taqiqlanishi emas. 1996–2001-yillardagi avvalgi “Tolibon” boshqaruvi davrida ham nafaqat shaxmat, balki boshqa ko‘ngilochar mashg‘ulotlar — musiqa, televideniye va internet ham taqiqlangandi. O‘sha paytda bu faoliyatlar diniy majburiyatlardan chalg‘itadi va qimorbozlikni rivojlantiradi, deb hisoblangan.
Izoh (0)