Афғонистондаги қурғоқчиликка қарамай, ҳўл мева ҳосилдорлиги ўтган йилга нисбатан икки баравар ошди.
“Дарё” мухбири Балх вилоятидаги мева бозорларида бўлиб, сотувчи ва харидорлар билан суҳбатлашди.
Афғонистон бозорларида , ҳўл мева арзонлигидан харидорлар мамнун.
Мозори Шариф шаҳрида яшовчи Лутфулла мева сотиб олиш учун бозорга келган, унинг айтишича, мева ҳеч қачон бунчалик арзон бўлганини эсламайди.
Унинг айтишича, ўтган йилларда бир килограмм ўрик ва шафтоли 100 афғони бўлган бўлса, ҳозир бу меваларнинг бир килоси 20 афғони сотилмоқда. Бу йил халқ учун баракали йил бўлди, дейди Лутфулла.
Унинг сўзларига кўра, кўпчилик ўрик ва шафтоли етарлича арзон бўлгани учун сотиб олмоқда.
Балх вилоятидаги дўкондорларнинг айтишича, бу йил бутун Балх вилояти туманларида мевали дарахтларнинг ҳосилдорлиги ошган ва бу мева маҳсулотларининг бир қисми ҳатто қўшни вилоятларга ҳам экспорт қилиняпти.
Ҳўл мева сотувчи Ниёз Муҳаммад Муҳаммадийнинг айтишича, бу йил олма, олхўри, ўрик, шафтоли, қулупнай, гилос каби ҳўл меваларнинг ҳосилдорлиги ўтган йилларга нисбатан сезиларли даражада ошди.
Унинг айтишича, авваллари Балх вилояти аҳолиси ўзларига зарур бўлган мева ва қишлоқ хўжалиги маҳсулотларини хорижий давлатлар ва қўшни вилоятлардан олиб келишган,аммо ҳозир Балх вилояти эҳтиёжларини қондириш билан бирга, Афғонистоннинг бошқа вилоятларига ҳам турли мева ва қишлоқ хўжалиги маҳсулотларини экспорт қилмоқда.
Балх вилоятидаги қатор боғбонларнинг айтишича, етарлича совуқхонанинг йўқлиги, иссиқ ҳаво меваларни арзон нархларда сотишга мажбур қилган. Айни пайтда Балх вилоятида 23 минг гектар боғ майдони мавжуд бўлиб, у ерда турли мевали дарахтлар етиштирилади.
Балх вилояти бозорларига энг кўп мева етказиб берувчи туманлар Чемтал, Чаҳар Болак, Деҳдади, Самарқанд ва Чаҳар Санг туманларидир.
Бу туманларда аҳолининг асосий қисми деҳқончилик, боғдорчилик ва чорвачилик билан шуғулланади.
Туманлардаги энг муҳим қишлоқ хўжалиги ва дарахт экинлари ўрик, шафтоли, қулупнай, тарвуз, полиз экинларидир.
Афғонистон бозорида мева нархлари
1 кг шафтоли — 20-50 афғони
1 кг ўрик — 20-50 афғони
1 кг олхўри — 20-50 афғони
1 кг гилос — 80-200 афғони
1 кг қулупнай — 100-150 афғони
1 кг Эрон апелсини — 100 афғони
1 кг Миср апелсини —130-150 афғони
1 кг Эрон олмаси — 150-200 афғони
1 кг Афғонистон олмаси —100-150 афғони
1 кг Бразилия олмаси — 250 афғони
1 кг Хитой олмаси — 200 афғони
1 кг Хитой ноки — 150-180 афғони
1 кг Афғонистон ноки — 200 афғони
1 кг Ҳинд банани — 80 афғони
1 кг манго — 90 афғони
1 кг қовун — 20-40 афғони
1 кг тарвуз — 7-10 афғони сотилмоқда.
Изоҳ (0)