AQSH rasmiylari Eron o‘zining yadroviy obyektlariga qilingan hujum uchun javob qaytarishiga tayyorlanmoqda. Bu haqda manbalarga tayanib NBC telekanali xabar berdi.
Oq uy va AQSH Mudofaa vazirligining nomi oshkor etilmagan rasmiylari tayyorgarlikni tasdiqlagan. Ular javob choralari aynan nimaga qaratilishi nomaʼlum ekanini aytmoqda. Prognozlarga ko‘ra, javob zarbasi AQSHning xorijdagi yoki ichki obyektlariga, yoki ikkalasiga ham qaratilishi mumkin. Hujum yaqin 48 soat ichida, ya’ni 22 va 23-iyun kunlari amalga oshishi prognoz qilinmoqda.
Eron allaqachon AQSHning Yaqin Sharqdagi harbiy bazalari va vakolatxonalariga zarba berish rejasini ishlab chiqqan. Biroq u yaqin orada amalga oshirilishi bo‘yicha ma‘lumotlar yo‘q. Avvalroq Islom respublikasi agar AQSH urushga qo‘shilsa, uning bazalari nishonga olinishidan ogohlantigandi. Amerika bazalari bir necha oy oldin yuqori shay holatga keltirilgan.
Eron tashqi ishlar vaziri Abbos Aroqchi AQSH hujumi sababli Hormuz bo‘g‘ozi yopilishini istisno etmagan. U bu javob choralardan biri ekanini aytgan.
Bizda ko‘plab variantlar mavjud. Biz umuman G‘arb davlatlariga ishonmasdik va ishonchsizligimiz ortdi. Albatta, diplomatiya eshiklari ochiq, ammo biz muzokaralar qachon tiklanishini hal qila olmaymiz, degan Abbos Aroqchi.
AQSHning Eronga hujumi
AQSH 22-iyunga o‘tar kechasi Erondagi uchta yadroviy obyektga zarba berdi. Soat 2:30 atrofida Amerikaning B-2 samolyotlari tog‘ ichida joylashgan Fordodagi uranni boyitish markaziga hujum qilib, unga kamida o‘nlab 13 tonnalik GBU-57 bunkerga qarshi bombalarini tashladi.
Bir vaqtning o‘zida suvosti kemalari Natanz va Isfahondagi obyektlarga 30 ga yaqin Tomahawk qanotli raketalarini uchirdi. Tramp nishonlar “to‘liq yo‘q qilinganini” e’lon qildi. Shu bilan birga, Oq uydagi yuqori martabali amaldorning The Wall Street Journal’ga ma’lum qilishicha, zarbalar Erondagi rejimni o‘zgartirishga qaratilmagan “bir martalik operatsiya” bo‘lgan.
Eron harbiylari AQSH hujumiga javoban Isroilga ballistik raketalar uchirdi va birinchi marta 2 ming kilometr masofaga uchadigan eng yangi Kheibar modelini qo‘lladi. Natijada Tel Aviv, Nes Sion va Hayfa shaharlarida bir nechta uylar vayron bo‘ldi, 86 kishi jarohatlandi, deya xabar berdi Sog‘liqni saqlash vazirligi. Isroil mudofaa armiyasi ma’lumotlariga ko‘ra, Eron jami 30 ga yaqin raketa uchirgan.
Eron tashqi ishlar vaziri Abbos Aroqchi Istanbulda turib matbuot anjumani o‘tkazdi. U mojaroga diplomatik yechim ko‘rmayotganini aytib, Putin bilan uchrashish uchun Moskvaga borishini ta’kidladi. Aroqchi AQSH prezidenti “nafaqat Eronga, balki o‘z xalqiga ham” xiyonat qilganini aytdi.
Izoh (0)