AQSHning sobiq prezidenti Jo Bayden o‘z qarorgohi joylashgan Delaver shtatidan Vashingtonga poyezdda ishga bormoqda. U ofisda sirli loyiha ustida mehnat qilmoqda. Bu haqda New York Post gazetasi xabar bermoqda.
“Baydenning Oq uydan chiqqan bir necha vakillari uning vaqtinchalik ofisida haftaning ko‘p qismida nima bilan shug‘ullanayotgani haqida qiziqish borligini aytishmoqda... ‘Bu haqiqatan ham jumboq’, dedi Baydenning sobiq yordamchilaridan biri Kolumbiya okrugiga tashriflari paytidagi faoliyati haqida. Baydenning qo‘l ostida ishlayotgan xodimlar esa ‘javob berishdan qochayotganini’ ta’kidladi”, deyiladi gazeta maqolasida.
Baydenga sobiq prezident sifatida Vashingtondagi ofis iyulgacha bepul taqdim etiladi. Ushbu ofisda u hozirgi va sobiq xodimlar bilan uchrashuvlar o‘tkazadi, shuningdek, Kongress a’zolari va Demokratik partiya rahbarlari bilan telefon orqali gaplashadi.
Taxminlarga ko‘ra, Bayden o‘z kitobini yozish, shuningdek, o‘z sharafiga kutubxona va fond ochish rejalari ustida ishlamoqda, deya ta’kidlaydi gazeta.
Manbalarning ta’kidlashicha, Bayden 400 ming dollarlik prezidentlik maoshidan mahrum bo‘lganidan keyin uning oilasi moliyaviy qiyinchiliklarga duch kelgan.
May oyi o‘rtalarida Baydenda prostata saratoni aniqlangani ma’lum bo‘ldi. Ma’lumotlariga ko‘ra, 82 yoshli siyosatchiga 16-may kuni, shifokorlar uni siydik chiqarish bilan bog‘liq muammolar tufayli tekshirib, prostata bezida “kichik tugun” borligi aniqlaganidan so‘ng tashxis qo‘yilgan. Shifokorlar saratonning tajovuzkor shaklga kirganini va suyaklarga metastaz berganini aniqladi. Kasallik allaqachon to‘rtinchi bosqichga yetgan.
Izoh (0)