Ular mukammal ko‘rinishadi, ammo hayotda hammasi boshqacha. Ba’zilari keng kiyim kiyib, o‘zlarini yashirishga harakat qiladi. Boshqalari esa ijtimoiy tarmoqlarga surat qo‘yishdan oldin yig‘laydi. Ushbu maqolada yillar davomida o‘z kamchiliklari bilan kurashib, hozirda o‘zini qabul qilishni o‘rganayotgan mashhurlarning samimiy gaplari bor.
Billi Aylish o‘zini yomon ko‘rgani uchun keng kiyim kiygan
Billi Aylish nafaqat rangli sochlari, balki keng kiyimdagi uslubi bilan ham mashhur. Bu uslub — modaga ergashish emas, balki o‘ziga nisbatan nafratning belgisi.
U bolaligidan tashqi ko‘rinishini yomon ko‘rganini yashirmaydi: “O‘zimni borimcha qabul qilmasdim, uzoq vaqt ovqat yemagan paytlarim bo‘lgan. Ochlikdan azob chekardim, ammo chidardim. Men o‘shanda atigi 12 yoshda edim va bu qandaydir telbalik edi”, deydi u.
Mashhurlik vaziyatni yanada yomonlashtirdi: nafaqat u o‘zini yomon ko‘rar, balki internetdagi ko‘pchilik ham uning tashqi ko‘rinishini tanqid qilardi.
U bunga qarshi kurashdi va o‘zini qabul qilish uchun ko‘p harakat qildi. Hatto Not My Responsibility nomli qisqa metrajli film ham suratga oldi. Unda u tomoshabinlarga asta-sekin keng kiyimlardan voz kechayotganini aytadi.
Billi hozir o‘zini oldingidan ko‘proq yaxshi ko‘rishini aytadi, lekin hali ham o‘ziga ishonchsizlik bilan kurashadi va ko‘pincha oynaga qarashdan qochadi.
Emma Uotson — yillar davomida o‘zini chiroyli deb hisoblamagan
Aktrisa va model Emma Uotsonning yuzi mashhur jurnallar muqovasida ko‘p bor chiqqan. Ammo u ham tashqi ko‘rinishidan uyalgan.
10 yoshga to‘lganimdan keyin o‘zimda kamchilik izlayverardim, degan Emma.
“Garri Potter”dagi roli uni mashhur qildi, lekin bu unga qulaylik emas, aksincha, bosim olib keldi.
U o‘zini munosib emasman deb, yillar davomida jurnallarga suratga tushishdan bosh tortdi. Hatto do‘stlari yoki muxlislari bilan suratga tushish ham unga qiyin edi. Bugun esa Emma bu holatni yengdi va o‘zini qabul qila boshladi. Ammo bu undan ancha vaqt talab qildi.
Selena Gomez — suratlarini ko‘z yosh bilan joylashtirgan
Selena sog‘lig‘i bilan kurashgan. U autoimmun kasalligi bilan yashaydi. Bu kasallik tufayli buyragini almashtirishga majbur bo‘lgan va uzoq vaqt davolangan. Dorilarning nojo‘ya ta’sirida yuzaga kelgan ortiqcha vazn va shishlar unga ruhiy zarar yetkazgan.
Selena bunday tashqi ko‘rinishga ko‘nikolmagan va omma oldida chiqishdan bosh tortgan. Shunga qaramay, Apple TV+’ning “Dear” nomli hujjatli loyihasida ishtirok etdi. Bu loyiha orqali u boshqa odamlarga yordam berishni istadi.
Bugungi kunda u ancha yaxshi holatda. Ammo u butun umr dori ichishga majbur. Bu esa doimiy ravishda o‘zini qabul qilish ustida ishlashni talab qiladi.
Bella Hadid oynadagi aksini tanimaydi
Bella Hadid supermodel bo‘lishiga qaramay, o‘ziga nisbatan ishonchsizlikni yashirmaydi. U tanasini qabul qila olmasligini ko‘p bor tan olgan.
Buning sabablaridan biri singlisi bilan doim raqobatlashishi va Laym kasalligidir. Bu kasallik teri holatiga ta’sir qiladi. Komplekslar asta-sekin Bella Hadidni depressiyaga va spirtli ichimliklarga qaram qilib qo‘ydi, bu ham uning o‘ziga bo‘lgan ishonchiga salbiy ta’sir ko‘rsatdi.
Ko‘rinishimdan ko‘nglim to‘lmaydi. Kasallikni his qilib, o‘z kasbim bilan shug‘ullanish menga og‘ir bo‘ladi, degan Hadid.
Hozirda u ichkilikni tashlagan va o‘ziga ko‘proq e’tibor qaratmoqda. Biroq baribir oynadagi aksini qabul qila olmaydi.
Bu boshqa bir qiz. O‘zimga va tanamga achinaman, deydi Hadid.
Mashhurlik, tashqi ko‘rinish yoki muvaffaqiyatdan qat’i nazar o‘ziga past baho berish har qanday insonni bezovta qilishi mumkin.
Izoh (0)