Osiyoning eng boy odami Mukesh Ambanining kolasi dunyoning eng gavjum mamlakatlaridan biri— Hindistonda Coca-Cola va Pepsi kompaniyalarining ko‘p yillik hukmronligiga putur yetkazmoqda.
68 yoshli milliarderning Campa Cola ichimliklarini ishlab chiqaruvchi kompaniyasi mahsulotni sotuvga chiqarganidan atigi ikki yil o‘tib, bozordagi ulushini keskin oshirdi. Gazlangan ichimlikning muvaffaqiyatini mutaxassislar uning arzon narxiga bog‘laydi: atigi 200 millilitrlik shisha uchun 10 rupiy (0,12 dollar yoki 1500 so‘m), bu Coca-Cola va Pepsi kompaniyalarining shunga o‘xshash hajmli shishasidan taxminan ikki baravar arzon.
Campa Cola tomonidan raqobat tahdidi brendlarni Hindistonda yangi tamlarni chiqarishga va narxlarni pasaytirishga majbur qildi. Masalan, Coca-Cola o‘zining shu nomdagi ichimliklarini mamlakatning baʼzi hududlarida 15 rupiyga (0,18 dollarga) tushirdi.
Mukesh Ambani — neft va gazni qayta ishlash, chakana savdo va ommaviy axborot vositalari bilan shug‘ullanuvchi Reliance Industries kompaniyasining asosiy egasi bo‘lgan hind biznesmeni hisoblanadi. So‘nggi maʼlumotlarga ko‘ra, Ambanining boyligi 115 milliard dollarga baholanmoqda, bu uni Osiyoning eng boy odamiga aylantiradi. U dunyodagi eng katta xususiy turar joy deb ataladigan o‘zining osmono‘par binosiga yashaydi.
2024-yilda jahon ommaviy axborot vositalari Ambanining o‘g‘li Anantning “asr to‘yi” haqida gapirishdi, unga Kardashyanlar oilasi, Buyuk Britaniyaning sobiq bosh vaziri Toni Bleyr va uning rafiqasi, Devid Bekxem va boshqa mashhurlar, jumladan, Bollivudning eng mashhur yulduzlari tashrif buyurishdi. Baʼzi maʼlumotlarga ko‘ra, to‘y 600 million dollarga tushgan. Umuman olganda, ushbu kruiz va ziyofatlarni o‘z ichiga olgan dabdabali to‘y olti oy davom etgan: buning uchun hatto Italiyaning Portofino va Genuya shaharlari “yopilgan”.
Izoh (0)