Amerika Qo‘shma Shtatlari va Xitoy Londondagi ikki kunlik muzokaralardan so‘ng savdo sulhini amalga oshirish kelishuviga erishdi deya ta’kidlamoqda mamlakat rasmiylari. Bu haqda CNN xabar berdi.
“Amerikalik va xitoylik muzokarachilar may oyida Jenevada bo‘lib o‘tgan muzokaralarning avvalgi raundi va ikki davlat rahbarlarining o‘tgan hafta bo‘lib o‘tgan telefon suhbati natijasida erishilgan konsensusni qanday amalga oshirish bo‘yicha kelishuvga erishdi”, dedi Xitoyning savdo bo‘yicha muzokarachisi Li Chenggang.
“Endi har ikki tomon rasmiylari taklifni o‘z rahbarlariga tasdiqlash uchun olib boradi. Agar u tasdiqlansa, so‘ng biz keyingi qadamlarni amalga oshiramiz”, dedi AQSH savdo vaziri Xovard Lyutnik.
Milliy iqtisodiy kengash direktori Kevin Xasset Tramp ma’muriyati Xitoy ishlab chiqarish sektori uchun muhim deb hisoblaydigan ba’zi mikrosxemalarga qo‘yilgan cheklovlarni yumshatishi mumkinligini bildirgan. AQSH sun’iy intellekt tizimlarini quvvatlantirishga qodir bo‘lgan “juda, juda yuqori sifatli Nvidia” chiplariga cheklovlarni saqlab qoladi, deya qo‘shimcha qilingan.
Londondagi uchrashuvda, shuningdek, Pekinning noyob minerallar yetkazib berishdagi ustunligi ta’kidlangan. Noyob yer minerallari va ularning magnitlari avtomobillardan tortib qiruvchi samolyotlargacha zarur hisoblanadi. Xitoy Amerika sanoati va mudofaasi uchun muhim bo‘lgan bu materiallarga deyarli monopol egalik qiladi.
O‘tgan hafta uzoq kutilgan telefon suhbatidan so‘ng, Tramp Xitoy noyob yer minerallari va magnitlar oqimini qayta boshlashga rozi bo‘lganini aytgandi. AQSH va Xitoy 12-may kuni Shveysariyada savdo bojlarini vaqtincha bekor qilish uchun 90 kunlik muddatdan foydalanishga kelishib olgandi. Ammo muhlat berilganiga qaramay, may oyida Xitoyning AQSHga eksporti 34,5 foizga keskin pasaygandi.
Izoh (0)