Xitoy va Qo‘shma Shtatlar butun dunyoda tinchlik va barqarorlik manbai, taraqqiyot dvigateliga aylanishi kerak. Bu haqda Xitoy rahbari Si Szinpin AQSH prezidentining milliy xavfsizlik masalalari bo‘yicha yordamchisi Jeyk Sallivan bilan uchrashuvda ma’lum qildi.
“Xitoy va Qo‘shma Shtatlar ikki yirik davlat sifatida butun dunyoda tinchlik va barqarorlik manbai, umumiy taraqqiyot dvigateliga aylanishi uchun tarix, xalq va butun dunyo oldida mas’ul bo‘lishi kerak”, deydi Si Szinpin.
Uning taʼkidlashicha, o‘zgaruvchan va notinch davrda mamlakatlar bo‘linib, qarama-qarshilik ko‘rsatmasdan, birlashishi zarur.
“Odamlar yopiqlik va orqaga yurishni emas, ochiqlik va taraqqiyotni xohlaydi”, deya qo‘shimcha qilgan Xitoy yetakchisi.
Sallivan 27—29-avgust kunlari Xitoyda bo‘ldi. Uning tashrifi doirasida tomonlar Xitoy-Amerika strategik aloqalarining yangi bosqichini muhokama qilgan. Shuningdek, tomonlar Ukraina mojarosi va Janubiy Xitoy dengizidagi vaziyat bilan bog‘liq masalalar yuzasidan fikr almashgan.
Sallivan va Xitoy TIV rahbari Van I Tayvan masalasini hamda Vashingtonning Xitoy va Rossiya o‘rtasidagi hamkorlikdan xavotirlari haqida suhbatlashgan.
Izoh (0)