Yashirin iqtisodiyotga qarshi kurash fonida Toshkentda yirik maxfiy sex va omborlar fosh qilindi

O‘zbekistonda yashirin iqtisodiyotning umumiy iqtisodiyotdagi ulushi 6-yilda 45-50 foizdan 35 foizga tushirildi.

So‘nggi yillarda yashirin iqtisodiyotga qarshi kurash fonida soliq turlari 13 tadan 9 taga kamaytirilib, 100 dan ortiq turdagi litsenziya va ruxsatnomalar bekor qilingan.

Shunga qaramay, respublikaga tovarlarni noqonuniy olib kirish va mahsulotlarni yashirin sexlarda ishlab chiqarishga urinishlar ko‘p ko‘zga tashlanmoqda.

Shu kabi holatlardan birida poytaxtning Uchtepa tumanida o‘tkazilgan tezkor tadbirda avvaldan kuzatuvga olingan shaxslardan biri sifati va bojxona rasmiylashtiruvini tasdiqlovchi hujjatlari bo‘lmagan stomatologik asbob-uskunalarni sotishga uringan vaqtida to‘xtatib qolindi.

Tezkor tadbir davom ettirilib, ushbu shaxs noqonuniy olib kirilgan tovarlarni saqlashga mo‘ljallangan yashirin joyda qiymati 2 milliard so‘mlik 116 turdagi 9 730 dona stomatologik buyum va dori vositalarini saqlab kelayotgani fosh bo‘ldi.

Boshqa bir holatda esa Mirzo Ulug‘bek tumanida o‘tkazilgan tezkor tadbirda avvaldan kuzatuvga olingan shaxs noturar joyda yashirin sex tashkil etgani fosh qilindi.

Bu joydan dori vositalari tayyorlashda ishlatiladigan salkam yarim tonna og‘irlikdagi turli xil kukunsimon xomashyo, 180 kg og‘irlikda va salkam 3 ming quti tabletka hamda kapsula ko‘rinishida, 133 dona flakonda qo‘lbola tarzda ishlab chiqarilgan dori vositalari qonunbuzarlardan musodara qilib olingan.

Sexda taxminiy qiymati 150 ming AQSH dollarini tashkil qiluvchi 19 dona uskuna, 21 dona temir qolip, shtrix-kod chop etilgan 132 to‘p yorliqlar, shu jumladan, “Neyromidin” va “Paratsetamol” dori vositasiga tegishli shtrix-kod yorliqlari, etiketkalar va qo‘llanmalar borligi aniqlangan.

Maʼlumot uchun, ushbu holatda olib qo‘yilgan salkam yarim tonna xomashyodan dorixonalarda o‘rtacha narxi 10 ming so‘mlik 850–900 ming dona “Fanigan” dori vositasini tayyorlash mumkin bo‘lgan.

Taʼkidlash joiz, qo‘lbola usulda tayyorlangan dori vositalari salomatlikka jiddiy zarar yetkazib, allergik reaksiyalar, zaharlanish va og‘ir asoratlarga olib keladi.