“Yulduzlar jangi”, “Supermen” va “Supermen II” filmlaridagi rollari bilan tanilgan Gollivud aktyori Terens Stemp joriy yil 17-avgust kuni 87 yoshida vafot etdi. Bu haqda uning oilasi Reuters’ga ma’lum qildi.
“Oskar” mukofotiga nomzod bo‘lgan Stemp Pasoliniyning “Teorema” (1968), “Do‘zax mavsumi” (1971) va “Pristsilla sarguzashtlari” (1994) filmlarida suratga tushgan.
“U aktyor va yozuvchi sifatida yuksak ijodiy meros qoldirdi, bu meros yana uzoq yillar davomida insonlarga ilhom berishda davom etadi”, deyiladi Stamp oilasi bayonotida.
Foto: IMDb
1938-yilda Londonning Sharqiy End hududida tug‘ilgan aktyor Ikkinchi jahon urushi davridagi bombardimonlarni boshidan kechirgan. U o‘ziga xos aktyorlik iste’dodi bilan mashhur edi.
Yangi Jeyms Bond bo‘lishga urinishidan natija chiqmagach, u italyan filmlarida rol ijro etdi va mashhur rejissyor Federiko Fellini bilan ishladi. Keyinchalik Stemp Gollivudga qaytib, “Supermen” (1978) va “Supermen II” (1980) filmlarida general Zod obrazini gavdalantirdi.
Foto: IMDb
Shuningdek, aktyor “Valkiriya” (2008), Tim Byortonning bir nechta filmlari, Jim Kerri ishtirokidagi “Har doim ‘ha’ degin”, hamda “Yulduzlar jangi. 1-qism: Yashirin tahdid” kartinalarida ham ishtirok etgan.
Stemp uzoq vaqt davomida turmush qurmagan, ammo 2002-yil 31-dekabr kuni 29 yoshli avstraliyalik Elizabet ORurk bilan nikohdan o‘tgan. Ammo juftlik 2008-yilda ajrashgan. Aktyor hech qachon farzand ko‘rmagan. 1960-yillarda esa aktrisa Juli Kristi va model Jin Shrimpton bilan bo‘lgan munosabatlari keng muhokamalarga sabab bo‘lgan.
Izoh (0)