2025/26-o‘quv yili boshlanishiga ham sanoqli kunlar qoldi. Toshkent shahar hokimining shahardagi umumta’lim maktablarida 15-avgustdan 1-oktyabrga qadar 24 ta maktab va 14 ta bozor atrofida yarmarkalar tashkil etish to‘g‘risidagi qarori imzolandi. Bundan maqsad o‘quvchilarning darsliklar hamda o‘quv qurollari bilan ta’minlashni yanada yaxshilashdir.
“Daryo” jamoasi eng ko‘p 85 ta joyda maktab bozori tashkil etilishi belgilangan “Chilonzor savdo buyum kompleksi”ga bordi. U yerda narx-navo turlicha, ammo bitta bolani maktabga tayyorlash uchun nima lozim bo‘lsa, barcha mahsulotlarni topish mumkin.
Ota-onalar bitta bolani maktabga tayyorlash uchun qancha pul sarflayotgani, narxlar ularni qoniqtiryaptimi yoki yo‘qligini bilish maqsadida so‘rovnoma o‘tkazdik.
So‘rovnoma natijalariga ko‘ra, 1 nafar bolaga o‘quv qurollari uchun o‘rtacha 200 mingdan 400 ming so‘mgacha, ryukzak uchun 100 mingdan 300 ming so‘mgacha, maktab formasi uchun esa kamida 400 mingdan 1,5 million so‘mgacha sarflashmoqda. Umumiy hisobda, 2025-yilda bir bolani ust-boshi va sumkasini ta’minlagan holda maktabga chiqarish 700 mingdan 2,5 milliongacha tushishi mumkin. Bir oilada ikki va undan ko‘proq farzand maktabga chiqadigan bo‘lsa, xarajatlarni taxminiy hisoblab ko‘rishingiz mumkin. Bu, albatta, kichkina mablag‘ emas.
Tanganing ikkinchi tomoni bo‘lganidek, sotuvchilar fikrini ham o‘rgandik. Sotuvchilarning ko‘pchiligi fikrlarini ochiq-oydin gapirishni istamadi, biroq ulardan biri narx-navo va o‘zlaridagi muammolarni aytishga kuch topdi.
“O‘zbekistonda inflyatsiya juda yuqori, hozir tovarning asl narxi ustiga 30-40 foiz ustama qo‘yib sotadigan bo‘lsak, odamlarning cho‘ntagi ko‘tarmayapti. Oldingi yillardagidek savdodan yaxshi foyda qolmayapti. Lekin ota-onalarga ham oson emas”, dedi sotuvchi.
“Daryo” jamoasi qarorda ko‘rsatilgan Yashnobod tumanidagi maktablaridan birida ham bo‘ldi. Ammo u yerda maktab bozori tashkil etilishidan maktab direktorining xabari yo‘qligi aniqlandi. So‘ngra maktab va maktabgacha ta’lim boshqarmasidagi mas’ul shaxs bilan bog‘langanimizda hali qarordagi birorta maktabda yarmarka yo‘qligi, qarorning ijrosini ta’minlash uchun bir necha kun kerakligi aytildi.
Shuningdek, ayrim qarorlar qabul qilinishidan oldin uning ijrosi ta’minlanishi uchun yetarlicha vaqt, imkoniyat hisobga olinishi kerak. Shunda ko‘plab topshiriqlar ijrosi o‘z vaqtida va kutilganidek natija berishi mumkin.
Izoh (0)