2025/26-ўқув йили бошланишига ҳам саноқли кунлар қолди. Тошкент шаҳар ҳокимининг шаҳардаги умумтаълим мактабларида 15 августдан 1 октябрга қадар 24 та мактаб ва 14 та бозор атрофида ярмаркалар ташкил этиш тўғрисидаги қарори имзоланди. Бундан мақсад ўқувчиларнинг дарсликлар ҳамда ўқув қуроллари билан таъминлашни янада яхшилашдир.
“Дарё” жамоаси энг кўп 85 та жойда мактаб бозори ташкил этилиши белгиланган “Чилонзор савдо буюм комплекси”га борди. У ерда нарх-наво турлича, аммо битта болани мактабга тайёрлаш учун нима лозим бўлса, барча маҳсулотларни топиш мумкин.
Ота-оналар битта болани мактабга тайёрлаш учун қанча пул сарфлаётгани, нархлар уларни қониқтиряптими ёки йўқлигини билиш мақсадида сўровнома ўтказдик.
Сўровнома натижаларига кўра, 1 нафар болага ўқув қуроллари учун ўртача 200 мингдан 400 минг сўмгача, рюкзак учун 100 мингдан 300 минг сўмгача, мактаб формаси учун эса камида 400 мингдан 1,5 миллион сўмгача сарфлашмоқда. Умумий ҳисобда, 2025 йилда бир болани уст-боши ва сумкасини таъминлаган ҳолда мактабга чиқариш 700 мингдан 2,5 миллионгача тушиши мумкин. Бир оилада икки ва ундан кўпроқ фарзанд мактабга чиқадиган бўлса, харажатларни тахминий ҳисоблаб кўришингиз мумкин. Бу, албатта, кичкина маблағ эмас.
Танганинг иккинчи томони бўлганидек, сотувчилар фикрини ҳам ўргандик. Сотувчиларнинг кўпчилиги фикрларини очиқ-ойдин гапиришни истамади, бироқ улардан бири нарх-наво ва ўзларидаги муаммоларни айтишга куч топди.
“Ўзбекистонда инфляция жуда юқори, ҳозир товарнинг асл нархи устига 30-40 фоиз устама қўйиб сотадиган бўлсак, одамларнинг чўнтаги кўтармаяпти. Олдинги йиллардагидек савдодан яхши фойда қолмаяпти. Лекин ота-оналарга ҳам осон эмас”, деди сотувчи.
“Дарё” жамоаси қарорда кўрсатилган Яшнобод туманидаги мактабларидан бирида ҳам бўлди. Аммо у ерда мактаб бозори ташкил этилишидан мактаб директорининг хабари йўқлиги аниқланди. Сўнгра мактаб ва мактабгача таълим бошқармасидаги масъул шахс билан боғланганимизда ҳали қарордаги бирорта мактабда ярмарка йўқлиги, қарорнинг ижросини таъминлаш учун бир неча кун кераклиги айтилди.
Шунингдек, айрим қарорлар қабул қилинишидан олдин унинг ижроси таъминланиши учун етарлича вақт, имконият ҳисобга олиниши керак. Шунда кўплаб топшириқлар ижроси ўз вақтида ва кутилганидек натижа бериши мумкин.
Изоҳ (0)