Shotlandiyadagi Cancer Research UK Scotland Centre olimlari insonning saratonga chalinishdan oldingi holatida demensiyaga o‘xshash buzilishlarni aniqladi. Bu kashfiyot davosi eng mushkul bo‘lgan onkologik kasalliklardan biri — oshqozon osti bezi saratonining oldini olish va davolash usullarini ishlab chiqishda yordam berishi mumkin. Tadqiqot natijalari Developmental Cell jurnalida chop etildi.
Mutaxassislar uzoq vaqt davomida sichqonlarda oshqozon osti bezi hujayralarini kuzatib, sog‘lom hujayralarni saraton hujayralariga aylantiradigan mexanizmlarni o‘rgandi. Tadqiqot jarayonida ma’lum bo‘ldiki, saraton boshlanishidan oldingi bosqichda avtofagiya, ya’ni hujayralarning “chiqindilarni qayta ishlash” jarayoni ishdan chiqadi. Natijada ortiqcha va yaroqsiz oqsillar hujayrada to‘planib, demensiya yoki boshqa neyrodegenerativ kasallikka chalingan miya hujayralarida uchraydigan oqsillarga o‘xshash birikmalar hosil qiladi.
Shunga o‘xshash oqsil birikmalari inson oshqozon osti bezi to‘qimalarida ham topilgan. Bu hodisa saraton rivojlanishi bilan bog‘liq bo‘lishi mumkinligini ko‘rsatadi.
Edinburgdagi Genetika va saraton institutida faoliyat yuritadigan professor Saymon Uilkinsonning ta’kidlashicha, KRAS geni mutatsiyasi va avtofagiyaning buzilishi saraton jarayonini boshlab berishda muhim rol o‘ynashi mumkin. Bu mexanizmni tushunish kelajakda kasallikni oldindan bashorat qilish va uni erta bosqichda to‘xtatish imkonini beradi.
Oshqozon osti bezi saratoni eng xavfli onkologik kasalliklardan biri bo‘lib, ko‘p hollarda juda kech bosqichlarda aniqlanadi, bu esa davolash imkoniyatlarini cheklaydi. Olimlar endilikda insonlarning yoshi, jinsi va ovqatlanish odatlarining hujayralarga ta’sirini o‘rganib, saratonni erta aniqlash yo‘llarini izlamoqda.
Izoh (0)