Pokiston va mamlakat nazoratidagi Kashmirda kuchli musson yomg‘irlari va yer ko‘chkilari oqibatida halok bo‘lganlar soni tez sur’atlar bilan oshmoqda. Rasman tasdiqlangan ma’lumotlarga ko‘ra, tabiiy ofat hozirgacha kamida 307 kishi hayotdan olib ketgan. Bu haqda BBC xabar berdi.
Ma’lum qilinishicha, eng ko‘p talafotlar mamlakat shimoli-g‘arbidagi tog‘li Xayber Paxtunxva provinsiyasida qayd etilgan. Mahalliy favqulodda vaziyatlar xizmati kamida 74 ta uy vayron bo‘lganini, qutqaruv operatsiyasi vaqtida esa harbiy vertolyot halokatga uchraganini bildirmoqda — hodisada bortdagi 5 nafar ekipaj a’zosi halok bo‘lgan. Provinsiya rahbari Ali Amin Gadapurning aytishicha, halokatga uchragan M-17 vertolyoti Afg‘oniston bilan chegaradosh Bajaur hududiga uchayotgan bo‘lgan.
Rasmiylarga ko‘ra, Pokiston nazorati ostidagi Kashmirda 9 kishi, shimoldagi Gilgit-Baltiston hududida esa yana 5 kishi halok bo‘lgan. Pokiston meteorologiya xizmati mamlakat shimoli-g‘arbiy qismida 21-avgustgacha kuchli yomg‘irlar davom etishini ma’lum qilgan. Ayrim hududlar falokat zonasi deb e’lon qilingan.
Xayber Paxtunxva provinsiyasining Buner tumanida omon qolganlardan biri Azizulloh AFP agentligiga bergan intervyusida hodisani “qiyomat”ga o‘xshatdi:
“Tog‘ qulayotgandek baland shovqin eshitdim. Tashqariga yugurib chiqdim — hammayoq larzaga kelgan edi. Suv to‘lqini shunchalik kuchli ediki, xuddi o‘lim ko‘zimga tik boqib turgandek bo‘ldi”.
Qo‘shni Hindiston nazorati ostidagi Kashmirda ham suv toshqinlari jiddiy falokatlarga sabab bo‘lmoqda. Himolay tog‘lari etagidagi qishloqlardan biriga to‘satdan kelgan suv to‘lqini kamida 60 kishining umriga zomin bo‘lgan, ko‘plab odamlar bedarak yo‘qolgan.
Ma’lumot o‘rnida, musson mavsumida (iyun-sentyabr) Janubiy Osiyoda yillik yog‘ingarchilikning 75 foizi yog‘adi. Har yili suv toshqinlari va ko‘chkilar kuzatiladi, ammo bu yil halok bo‘lganlar soni 300 kishidan oshib ketdi. Iyul oyida Pokistonning eng zich yashovchi hududi – Panjob provinsiyasida yog‘ingarchilik 2024-yilga nisbatan 73 foizga ko‘p bo‘lgan, qurbonlar soni esa misli ko‘rilmagan tus olgan. Mutaxassislarning ogohlantirishicha, iqlim o‘zgarishi bunday ofatlar sonining ko‘payishi va kuchayishiga olib kelmoqda.
Izoh (0)