44 yoshli xonanda va aktyor Jastin Timberleyk 30-iyul kuni Turkiyaning Istanbul shahrida bergan konsert bilan yakunlagach, Laym kasalligiga chalinganini e’lon qilgan edi. Ushbu xabardan so‘ng Lady Mail nashri xuddi shunday xastalikni boshidan o‘tkazgan boshqa mashhur insonlarni eslashga qaror qildi.
Laym kasalligi (yoki kana va burgalar orqali yuqadigan borrelioz) bakterial infeksiya bo‘lib, odatda tropik kanalar chaqishi orqali yuqadi. Bu kasallikni asosan Borrelia burgdorferi deb nomlangan bakteriya keltirib chiqaradi. Xastalik mushak og‘rig‘i, bosh og‘rig‘i, xotira va ong faoliyatida buzilishlar, bo‘g‘imlar shishishi, charchoq va boshqa noxush simptomlar bilan kechadi. Bunga qarshi umrbod immunitet shakllanmaydi, ya’ni, kasallikka bir necha marta chalinish ehtimoli mavjud.
Jastin Timberleyk
Timberleyk bu tashxis haqida o‘zining gastrol safari tugagach e’lon qildi. Uning sahnadagi chiqishlari muxlislar tomonidan tanqidga uchragani bois xonanda vaziyatni tomoshabinlarga tushuntirib berishga qaror qilgan.
Jastin Biber
2020-yilda yana bir xonanda — Jastin Biber ham Laym kasalligiga chalingani ma’lum bo‘ldi. Bundan bir yil avval paparatsilar uni Beverli Hillsda qo‘lida osma ukol bilan yurganini suratga olishgan edi. Shu bois muxlislar orasida Biber giyohvandlikka qarshi kurashayotgani haqidagi mish-mishlar tarqaldi. Biroq qo‘shiqchi bu gaplarni rad etdi va uning holatiga Laym kasalligi bilan birga surunkali mononukleoz ham sabab bo‘lganini tushuntirdi.
Bella Hadid
Mashhur model Bella Hadid 2012-yilda Laym kasalligi bilan og‘rigan. Xastalik uning onasi Yolanda va ukasi Anvarda ham bir vaqtda aniqlangan. Modelning yaqinlari qisqa vaqtda tuzalgan bo‘lsa-da, Bella hali-hanuz uning alomatlarini muntazam his qilib kelmoqda. Kasallik yana bezovta qilganda Bella Hadidga tibbiy yordam kerak bo‘ladi, shuning uchun u bir necha bor faoliyatida uzoq tanaffuslar qilgan. Eng uzun tanaffus ikki yil davom etgan. Model ijtimoiy tarmoqlarda sog‘lig‘i haqida ochiq gapirib, Laym kasalligiga qarshi xabardorlikni oshirishga harakat qiladi.
Ben Stiller
Aktor, rejissyor va prodyuser Ben Stiller ham 2010-yilda Laym kasalligiga uchragan. Avvaliga u tizza bo‘g‘imidagi og‘riqlar bilan shifokorga murojaat qilgan, so‘ng aktyorga Laym tashxisi qo‘yilgan. Bir necha kurs davolashdan so‘ng xastalik belgilari yo‘qolgan. 2011-yildagi intervyusida u o‘zini yaxshi his qilayotganini bildirgan, biroq Laym kasalligi tanaga kirgach, uni butunlay tark etishi qiyinligini alohida aytib o‘tgan.
Avril Lavin
Avril Lavinning san’atni tark etgani va 2014-yilda jamoatchilik ko‘zidan yo‘qolganidan so‘ng turli mish-mishlar chiqqan edi. Aslida, bu davrda qo‘shiqchi o‘zini yomon his qilgan, ammo bir necha bor tekshiruvlardan o‘tganiga qaramay, to‘g‘ri tashxis qo‘yilmagan. Nihoyat, Laym kasalligi aniqlangach, virus tanada ancha ildiz otgani ma’lum bo‘lgan. Yarim yil o‘rnidan tura olmagan Lavin sog‘ayib ketishiga ishonmagan. Keyinchalik u besh yil davomida kasallikning asoratlari bilan kurashgan.
Lavin sahnaga qaytishini “Head Above Water” albomini chiqarish bilan nishonlagan. Shuningdek, u Laym kasalligiga chalingan bemorlarni qo‘llab-quvvatlash va bu boradagi xabardorlikni oshirishga bag‘ishlangan faoliyat bilan shug‘ullana boshlagan.
Izoh (0)