44 ёшли хонанда ва актёр Жастин Тимберлейк 30 июль куни Туркиянинг Истанбул шаҳрида берган концерт билан якунлагач, Лайм касаллигига чалинганини эълон қилган эди. Ушбу хабардан сўнг Lady Mail нашри худди шундай хасталикни бошидан ўтказган бошқа машҳур инсонларни эслашга қарор қилди.
Лайм касаллиги (ёки кана ва бургалар орқали юқадиган боррелиоз) бактериал инфекция бўлиб, одатда тропик каналар чақиши орқали юқади. Бу касалликни асосан Боррелиа бургдорфери деб номланган бактерия келтириб чиқаради. Хасталик мушак оғриғи, бош оғриғи, хотира ва онг фаолиятида бузилишлар, бўғимлар шишиши, чарчоқ ва бошқа нохуш симптомлар билан кечади. Бунга қарши умрбод иммунитет шаклланмайди, яъни, касалликка бир неча марта чалиниш эҳтимоли мавжуд.
Жастин Тимберлейк
Тимберлейк бу ташхис ҳақида ўзининг гастрол сафари тугагач эълон қилди. Унинг саҳнадаги чиқишлари мухлислар томонидан танқидга учрагани боис хонанда вазиятни томошабинларга тушунтириб беришга қарор қилган.
Жастин Бибер
2020 йилда яна бир хонанда — Жастин Бибер ҳам Лайм касаллигига чалингани маълум бўлди. Бундан бир йил аввал папарацилар уни Беверли Ҳиллсда қўлида осма укол билан юрганини суратга олишган эди. Шу боис мухлислар орасида Бибер гиёҳвандликка қарши курашаётгани ҳақидаги миш-мишлар тарқалди. Бироқ қўшиқчи бу гапларни рад этди ва унинг ҳолатига Лайм касаллиги билан бирга сурункали мононуклеоз ҳам сабаб бўлганини тушунтирди.
Белла Ҳадид
Машҳур модел Белла Ҳадид 2012 йилда Лайм касаллиги билан оғриган. Хасталик унинг онаси Ёланда ва укаси Анварда ҳам бир вақтда аниқланган. Моделнинг яқинлари қисқа вақтда тузалган бўлса-да, Белла ҳали-ҳануз унинг аломатларини мунтазам ҳис қилиб келмоқда. Касаллик яна безовта қилганда Белла Ҳадидга тиббий ёрдам керак бўлади, шунинг учун у бир неча бор фаолиятида узоқ танаффуслар қилган. Энг узун танаффус икки йил давом этган. Модель ижтимоий тармоқларда соғлиғи ҳақида очиқ гапириб, Лайм касаллигига қарши хабардорликни оширишга ҳаракат қилади.
Бен Стиллер
Актор, режиссёр ва продюсер Бен Стиллер ҳам 2010 йилда Лайм касаллигига учраган. Аввалига у тизза бўғимидаги оғриқлар билан шифокорга мурожаат қилган, сўнг актёрга Лайм ташхиси қўйилган. Бир неча курс даволашдан сўнг хасталик белгилари йўқолган. 2011 йилдаги интервьюсида у ўзини яхши ҳис қилаётганини билдирган, бироқ Лайм касаллиги танага киргач, уни бутунлай тарк этиши қийинлигини алоҳида айтиб ўтган.
Аврил Лавин
Аврил Лавиннинг санъатни тарк этгани ва 2014 йилда жамоатчилик кўзидан йўқолганидан сўнг турли миш-мишлар чиққан эди. Аслида, бу даврда қўшиқчи ўзини ёмон ҳис қилган, аммо бир неча бор текширувлардан ўтганига қарамай, тўғри ташхис қўйилмаган. Ниҳоят, Лайм касаллиги аниқлангач, вирус танада анча илдиз отгани маълум бўлган. Ярим йил ўрнидан тура олмаган Лавин соғайиб кетишига ишонмаган. Кейинчалик у беш йил давомида касалликнинг асоратлари билан курашган.
Лавин саҳнага қайтишини “Head Аbovе Water” альбомини чиқариш билан нишонлаган. Шунингдек, у Лайм касаллигига чалинган беморларни қўллаб-қувватлаш ва бу борадаги хабардорликни оширишга бағишланган фаолият билан шуғуллана бошлаган.
Изоҳ (0)