“Yuragimdagi ‘olov’ni 30 yil ko‘mib yashadim” — Zohida Umarova tanqidlarga uchragan “Ovoz” loyihasidagi ishtiroki haqida (video)

Xonanda Zohida Umarova YouTube’dagi “Daryo lifestayle” kanaliga bergan intervyusida “Ovoz 50+” loyihasidagi ishtiroki va uni qudasi Madaniyat vaziri Ozodbek Nazarbekovning bunga munosabati haqida gapirdi.

“Qizimga o‘lim tilashdi”

— Kenja qizim Madlen ham “Ovoz” loyihasida qatnashgandi. To‘g‘ri u yosh, balki kamchiliklarga yo‘l qo‘ygandir. Ammo uni haqorat qilganlar, hatto o‘lim tilagan insonlar ham bo‘ldi. Bu ona sifatida menga juda og‘ir botdi. O‘zimni umr bo‘yi gapirishsin, haqorat qilishsin, ammo farzandlarimga tosh otishmasin. Sudlashib haqligimni isbotlamayman, shunchaki qo‘shiqchi ona bo‘lib qizimni himoya qilaman, degan umidda “Ovoz 50+” loyihasida ishtirok etdim. Ammo qizimdan ham ko‘proq o‘zim negativlar bo‘roniga uchradim, deydi Zohida Umarova.

“Ozodbek Nazarbekov menga kim bo‘ladi?”

— “Vazir bilan quda bo‘lganingiz uchun hakamlar hayʼati sizning ishtirokingizni yuqori baholashdi”, degan gaplar ham bo‘ldi. Bir narsani aytib o‘tay, men na loyiha boshlanishida, na yakunida Ozodbek Nazarbekov  bilan gaplashdim. U Yorqinxo‘ja Umarovning qaynotasi, menga kim bo‘ladi? U ham sanʼatkor, men ham sanʼat vakiliman. O‘rtadagi tafovut shundaki, u mendan 5-10-yildan keyin katta sahnaga chiqqan sanʼatkor. Men Ozodbek Nazarbekovni hali xalq tanimasidan avval “Yurt qadri” qo‘shig‘im bilan tinglovchilarga tanilib ulgurgandim. Ozodbek Nazarbekovga ehtiyojim yo‘q, hech qachon undan biror loyihada ishtirok etish haqida so‘ramayman. Chunki mening nomusim, orim bor. Keyin yana bir gap, men Ozodbek Nazarbekovga qiz uzatmaganman, agar shunday bo‘lganida undan nimanidir so‘rashim mumkin edi. Shukrki, o‘g‘lim Yorqinxo‘ja erkak kishi hech qachon uning oriyatini yerga urib, yordam so‘ramayman, deydi Zohida Umarova.

“Yuragimdagi ‘olov’ni 30 yil yuragimga ko‘mib yashadim”

— Men salkam 30 yildan keyin yana sahnaga qaytdim. Shuncha yil davomida ulkan lavani yuragimga ko‘mib yashadim. Sababi, ayol sanʼatkorga juda qiyin, u ko‘p mashaqqatlarni yengib o‘tishi kerak. Katta farzandlarim ketma-ket dunyoga kelishgan. Deyarli ikkita chaqaloqni bir vaqtda katta qilganman. Turmush o‘rtog‘imning o‘limidan keyin ro‘zg‘orning og‘irligi yelkamga tushgan. Men o‘zim uchun vaqt ajratolmaganman. Ammo bir daqiqa ham sanʼatdan ketgan inson emasman. Yuragimda hamisha “Men sanʼatga qaytaman va yana qo‘shiq kuylayman”, degan maqsad yashagan. Meni sahnada ko‘rgan insonlar g‘azablanishmasin, shunchaki shu ayol ham 30 yillik maqsadlarini amalga oshiryapti deb qarashsin, deydi Zohida Umarova.

“Qaysi sanʼatkor jaraq-jaraq pul topadi?”

— Sababini bilmayman, ammo sanʼatkorlarni ko‘p pul topadi, deb o‘ylashadi. Shu savol meni ko‘p o‘ylantiradi, qaysi sanʼatkor jaraq-jaraq pul topadi? To‘g‘ri, tadbirkorligi yoki qo‘shimcha bizneslari bor sanʼatkorlarning moddiy yashashi yaxshidir. Ammo faqat sanʼatning ortidan kun ko‘radigan va o‘z kuchi bilan sahnaga chiqqan xonandalarda unday emas. Masalan, o‘g‘lim Yorqinxo‘ja Umarov bitta hovlini qurgunicha 4 yil sarfladi. To‘yga boradi, topganini olib keladi. Tezroq uyni qurib, o‘g‘limni uylantiray deb men harakat qilaman. Yana bir gap, sanʼatkor sevimli bo‘lish uchun yillar sarflaydi, baʼzan umrini ketkazib ham sevimli bo‘lolmagan sanʼatkorlar bor, deydi Zohida Umarova.

“Keliniga yon bosadigan qaynonaman”

— O‘g‘lim bilan kelinimning munosabatlariga aralashmaslikka va hamisha betaraf bo‘lishga harakat qilaman. Kelinim juda yosh, bolalarcha beg‘ubor. Baʼzi vaziyatlarda esa uning yonini olishimga ham to‘g‘ri keladi. Chunki o‘zim ham bir paytlar yosh bo‘lganman va atrofimdagi insonlarning qo‘llab-quvvatlashiga ehtiyoj sezganman. O‘ylaymanki, qaynonalar qizlari ham kimningdir qo‘lida ekanligini, kelin esa boshqa bir insonning suyukli farzandi ekanligini o‘ylab ish tutishsa, hech qanday oilaviy muammolar yuzaga kelmaydi. Chunki, ko‘p narsa qaynonaga bog‘liq. Kelinimdan hamisha rizoman, yosh bo‘lsa-da, ro‘zg‘orni uddalaydi, unga juda yaxshi tarbiya berishgan. Pishirgan har narsasini menga ilinadi, deydi Zohida Umarova.

Suhbatni to‘liq holda quyida tomosha qilishingiz mumkin.