Хитойлик хакерлар АҚШ ядро хавфсизлиги тизимига ҳужум қилди — Bloomberg

Хитойлик кибержиноятчилар АҚШ Энергетика вазирлигининг миллий ядровий хавфсизлик бошқармасига ҳужум уюштирди. Бу ҳақда Bloomberg хабар берди.

Хакерлар Microsoft SharePoint дастурий таъминотидаги заифликдан фойдаланиб, ядро қуролини ишлаб чиқариш ва демонтаж қилиш учун масъул бўлган муассасага киберҳужум уюштирган. Таъкидланишича, ҳужум оқибатида ҳеч қандай махфий маълумотлар тарқалиб кетмаган.

Энергетика вазирлиги вакили Bloomberg агентлигига ҳужум уюштирилганини тасдиқлаган. Хусусан, у хакерлик 18 июль куни содир этилиб, жиддий зарар етмаганини билдирган. Агентлик маълумотларига кўра, киберҳужумчилар АҚШ Таълим вазирлиги, Флорида даромадлар департаменти ва бошқа бир қатор идораларга тегишли тизимларда ҳам ноқонуний ҳаракатлар содир этган.

Microsoft компанияси олдинроқ хитойликлар SharePoint заифликларидан фойдаланган ҳолда бутун дунё ташкилотлари сайтларига бостириб кираётганини маълум қилганди. Жумладан уларнинг 3 та хакерлик гуруҳи номлари очиқланганди: Lineн Typhoon, Violet Typhoon ва Storm-2603.

Microsoft’нинг билдиришича, компания хатоликларни тузатган. Бироқ бундан олдин, Bloomberg маълумотларига кўра, АҚШда 60 та муассасада, жумладан, энергетика соҳаси ташкилотлари, консалтинг фирмалари ва университетларда киберҳужумлар қайд этилган. Хакерлар дастурий таъминотдан Европадан Яқин Шарққача бўлган ҳукумат тизимларини бузиш учун ҳам фойдаланган.

Маълумот учун, 2023 йил 21 июль куни хитойлик хакерлар АҚШ Давлат департаменти ходимларининг, жумладан, Штатларнинг Хитойдаги элчиси электрон почтасини бузиб кирганди. Бундан ташқари, хитойликлар 2024 йил 31 декабрь куни АҚШ Молия вазирлиги тизимида ҳам бузғунчилик қилиб, кўплаб ҳужжатларни ўғирлаганди.