Hindistonda talabalarga Markaziy Amerikadagi uchta va O‘zbekistondagi bitta tibbiyot universitetida tahsil olmaslik qat’iy tavsiya qilindi. Hindiston Milliy tibbiy komissiyasi abituriyentlarga ogohlantirish berdi. Bu haqda The New Indian Express xabar berdi.
Bu muassasalar Hindistonning tibbiy ta’lim standartlariga javob bermasligi ma’lum qilingan. Quyidagi universitetlarda tahsil olmaslik tavsiya qilinmoqda:
- Markaziy Amerika sog‘liqni saqlash va fanlar universiteti, Beliz;
- Kolumbiya Markaziy universiteti, Beliz;
- Vashington sog‘liqni saqlash va fanlar universiteti, Beliz;
- Toshkent davlat tibbiyot universiteti Chirchiq filiali, O‘zbekiston.
Ogohlantirish Hindistonning Meksikadagi elchixonasi va Tashqi ishlar vazirligining Yevrosiyo bo‘limi tomonidan jiddiy xavotirlar bildirilgach e’lon qilingan. Ular yuqoridagi universitetlarda zarur akademik va klinik standartlar yo‘qligini ta’kidlagan.
Shuningdek, tibbiyot muassasalarida zarur infratuzilma yo‘qligi, talabalardan haddan ortiq to‘lovlar olinishi, o‘quv sharoiti va ta’lim sifati borasida yolg‘on ma’lumotlar berilgani aytilmoqda. Ba’zi talabalar o‘qishni tark etmoqchi bo‘lganda, ularga bosim o‘tkazilgan.
Chet elda tibbiyot bo‘yicha o‘qiyotgan hindistonliklar Xorijiy tibbiyot bitiruvchisi litsenziati (FMGL) qoidalariga qat’iy rioya qilishi zarur. Bu qoidalar kurs davomiyligi, o‘quv dasturi, ta’lim tili, klinik tayyorgarlik va amaliyotni qamrab oladi. Ushbu shartlarni bajarmaslik Hindistonda tibbiyot bilan shug‘ullanish uchun ro‘yxatdan o‘tishni rad etishga olib kelishi mumkin.
O‘zbekistonda tibbiy ta’lim olayotgan hindistonlik talaba shikoyati
Fevral oyidan boshlab Toshkent tibbiyot akademiyasida o‘qishni boshlagan 21 yoshli hindistonlik talaba darslar, imtihonlar va yotoqxonadagi sharoitlardan shikoyat qilgan edi.
Unga ko‘ra, o‘qituvchilar ingliz tilida zo‘rg‘a gapiradi, professorlar sifatsiz ta’lim beradi, imtihonlar javobi esa oldindan yodlatiladi. U yotoqxona jirkanch ahvolda ekani, xojatxona oyda bir tozalanishi, hamma yoqni mozor bosib ketganiga ham to‘xtalgandi.
Tanqiddan so‘ng oliy ta’lim vaziri Qo‘ng‘irotboy Sharipov Toshkent tibbiyot akademiyasiga borib, hindistonlik talabalar bilan uchrashgan.
“Suhbat davomida talabalar universitetda yaratilgan zamonaviy shart-sharoitlardan mamnun ekanliklarini, ta’lim sifati, professor-o‘qituvchilar bilan muloqot va yashash imkoniyatlari borasida ijobiy fikrlarni bildirdi”, deya xabar bergan vazirlik.
Vazir universitet rahbariyatiga xorijlik talabalar uchun qulayliklarni ko‘paytirish bo‘yicha topshiriqlar bergani ta’kidlangan.
Izoh (0)