Ҳиндистон Миллий тиббий комиссияси абитуриентларга Марказий Америкадаги учта ва Ўзбекистондаги битта тиббиёт университети — Тошкент давлат тиббиёт университети Чирчиқ филиалида таҳсил олмасликни тавсия қилгани ҳақида хабар берилганди. Университет матбуот хизмати мазкур ҳолат юзасидан муносабат билдирди.
Унда таъкидланишича, университетда академик ва клиник стандартларга қатъий риоя қилинмоқда. Тошкент давлат тиббиёт университети Чирчиқ филиали президентнинг 2023 йил 28 июлдаги қарорига асосан ташкил этилган бўлиб, 2024 йил декабрь ойидан бошлаб тўлиқ фаолият юрита бошлаган.
Бугунги кунда филиалда 2 та факультетда 4 та бакалавриат таълим йўналиши ҳамда 13 та клиник ординатура мутахассислиги бўйича жами 801 нафар талаба таҳсил олмоқда. Хусусан, ҳозирда 5 нафар ҳиндистонлик, 1 нафар иорданиялик, 8 нафар покистонлик ва 7 нафар мисрлик хорижий талабалар таълим олмоқда.
Филиалда таълим жараёни Ўзбекистондаги амалдаги тиббий таълим стандартлари ҳамда Жаҳон тиббий таълим федерацияси (WFME) талабларига мос келувчи замонавий ўқув дастурлари асосида ташкил этилган. 10 га яқин Тошкент вилояти ва Чирчиқ шаҳридаги клиник базаларда талабалар малакали мутахассислар раҳбарлигида амалий кўникмаларни эгалламоқда.
Филиал Бутунжаҳон тиббий таълим федерацияси (WFME) ҳамда Халқаро тиббий таълимни ривожлантириш жамғармаси (FAIMER) томонидан юритиладиган The World Directory of Medical Schools рўйхатига киритилган.
Шунингдек, инфратузилма ва моддий-техника базаси — замонавий ва кенг қамровли экани таъкидланган. Филиалда замонавий ўқув бинолари, лабораториялар, симулясион марказлар, электрон таълим платформалари, ахборот-ресурс маркази (кутубхона) ва талабаларга мўлжалланган турар жойлар барча зарур шароитлар билан таъминланган.
Талабалар учун очиқ ва шаффоф муҳит яратилгани ҳам айтилди. Филиал фаолиятида шаффофлик, академик эркинлик, тенглик ва талабалар ҳуқуқларини ҳимоя қилиш устувор тамойил ҳисобланади. Ҳеч қандай босим ёки мажбурлаш ҳолатларига йўл қўйилмайди. Барча ўқиш шартлари, тўлов миқдори ва академик талабларга оид маълумотлар расмий манбалар орқали очиқ эълон қилинади.
Халқаро ҳамкорлик ва хорижий талабалар контингенти тўғрисида ҳам маълумот берилди. Унга кўра, бугунги кунда филиалда Ҳиндистондан келган талабалар муваффақиятли таҳсил олиб бормоқда. Улар учун махсус адаптация дастурлари, инглиз тилида ўқитиш гуруҳлари ва клиник амалиёт имкониятлари яратилган. Филиал нуфузли халқаро университетлар ва клиник марказлар билан доимий ҳамкорлик олиб бормоқда.
“Ҳиндистон Миллий тиббий комиссияси билан очиқ мулоқотга тайёрмиз”
“Тошкент давлат тиббиёт университети Чирчиқ филиали Ҳиндистон Миллий тиббий комиссияси (NMC) томонидан билдирилган хавотирларни жиддий қабул қилади. Шу билан бирга, бу маълумотлар жойида ўрганилмаган ва асоссиз экани таъкидланади.
Биз Ҳиндистон билан таълим соҳасидаги дўстона ва самарали ҳамкорликни янада мустаҳкамлашдан манфаатдормиз ва исталган текширув ҳамда мулоқот учун очиқмиз”, дейилади хабарда.
Изоҳ (0)