“Arsenal” yozgi transfer oynasida “Brayton”ning yaponiyalik vingeri Kaoru Mitomani o‘z safiga qo‘shib olish uchun jiddiy harakat qilib ko‘radi. Bu haqda jurnalist Florian Plettenberg xabar bermoqda.
Avvaliga londonliklar “Real Madrid” hujumchisi Rodrigo bilan shartnoma imzolamoqchi edi, biroq moliyaviy tomondan bir qancha muammolar paydo bo‘ldi va bu transferning amalga oshishi so‘roq ostida turibdi. Shu sababli, “Arsenal” endi boshqa variantlarga e’tibor qaratmoqda — ulardan biri Mitoma.
Mitomaga Germaniyaning “Bavariya” klubi ham jiddiy qiziqmoqda. Myunxenliklar Florian Virtsni qo‘lga kiritishda muvaffaqiyatsizlikka uchragach, unga muqobil variant sifatida yaponiyalik vingerni xarid qilish haqida o‘ylamoqda.
27 yoshli futbolchisi 2022/23-yilgi mavsumdan buyon “Brayton” safida harakat qilmoqda. U o‘zining tezligi, dribblingi va kreativ o‘yinlari bilan muxlislar mehrini qozongan. “Arsenal” va “Brayton” o‘rtasidagi munosabatlar ijobiy — so‘nggi yillarda Ben Uayt va Leandro Trossard kabi futbolchilar bilan bog‘liq kelishuvlar bunga misol bo‘la oladi. Klub xaridor jamoalar aytilgan summani to‘lasa, Kaoruni qo‘yib yuborishga qarshi emasligini ma’lum qilgan.
Mitomaning “Brayton” bilan shartnomasi 2027-yilning yoziga qadar amal qiladi. U joriy mavsum Angliya Premyer Ligasi doirasidagi 35 ta bahsda maydonga tushib, o‘z hisobiga 10 ta gol va 3 ta ssist yozdirib qo‘ygan. Transfermarkt portali Mitomoning qiymatini 45 million yevroga baholagan.
Izoh (0)