Fransiyaning “Pari Sen-Jermen” klubi Madridning “Real” jamoasida to‘p surayotgan braziliyalik futbolchi Rodrigo Goesni o‘z safiga qo‘shib olishni rejalashtirmoqda. Bu haqda ESPN Brazil nashri xabar berdi.
Manbaga ko‘ra, Parij klubi allaqachon 24 yoshli futbolchining vakillari bilan bog‘lanib, uning ehtimoliy transferini muhokama qilgan.
Avvalroq Rodrigoga Saudiya Arabistonining “An-Nassr” hamda Londonning “Arsenal” klublari ham qiziqish bildirgani haqida xabarlar tarqalgan edi. Biroq hozircha bu transfer haqida boshqa xabarlar yo‘q.
Rodrigo “qaymoqranglilar” safini tark etishi mumkin. Sababi, u jamoada almashtirib bo‘lmas futbolchi hisoblanmaydi. Shu bois u ko‘proq o‘yin amaliyoti taqdim etadigan klubga o‘tishni istamoqda. “Real Madrid” esa futbolchi uchun kelib tushadigan takliflarni ko‘rib chiqishga tayyor.
Ma’lumot uchun, Rodrigo o‘tgan mavsumda barcha musobaqalar doirasida 51 ta o‘yinda maydonga tushib, 14 ta gol va 10 ta golli uzatmaga mualliflik qilgan. Uning klub bilan tuzgan shartnomasi 2028-yil yozigacha amal qiladi. Transfermarkt portali Rodrigoning qiymatini 90 million yevroga baholagan.
Izoh (0)