Madridning “Real” klubi yarim himoyachisi Arda Gyuler jamoani ijaraga tark etish variantini rad etmoqda. Relevo nashrining xabariga ko‘ra, turkiyalik futbolchi bu mavsum kam o‘yin amaliyotiga ega bo‘layotganidan norozi. U klub safida ko‘proq o‘ynashni yoki to‘liq transfer asosida boshqa jamoaga ketishni istamoqda.
Arda uzoq vaqt davomida asosiy tarkibdan chetda qolayotgani sababli jamoadagi kelajagi borasida xavotirga tusha boshladi. So‘nggi beshta o‘yinda umuman maydonga tushmagan Gyuler nihoyat o‘z imkoniyatiga ega bo‘ldi. U Ispaniya kubogi doirasidagi “Real Sosyedad”ga qarshi bahsda asosiy tarkibda maydonga tushib, 84 daqiqa harakat qildi.
Turkiyada yosh futbolchiga juda katta umid bog‘langan va bu bosim unga tasir o‘tkazmoqda. Arda atrofidagi ijtimoiy omillar ham moslashish jarayonini qiyinlashtirmoqda. Bunday holat “Real Madrid” yosh futbolchilari orasida tez-tez kuzatiladi. Karlo Anchelotti bu jarayon tabiiy ekanligini ta’kidlab, shunday dedi:
Hammasi vaqt bilan bog‘liq. Gyuler ham boshqa yosh futbolchilar singari “Real”ga moslashish jarayonidan o‘tmoqda. Buni Vinisius, Valverde va Rodrigo misolida ko‘rishingiz mumkin
Ma’lumot uchun, 20 yoshli futbolchi 2023-yil yozida “Fenerbahche”dan “Real”ga 20 million yevro evaziga o‘tgan edi. Joriy mavsumda u barcha musobaqalarda 28 ta o‘yinda maydonga tushib, 3 ta gol va 5 ta golli uzatmani amalga oshirdi.
Avvalroq Gyulerga Germaniya Bundesligasi klublari qiziqish bildirayotgani haqida xabarlar tarqalgan edi. “Bavariya” va “Bayer” turkiyalik futbolchini sotib olish imkoniyatini ko‘rib chiqayotgani aytilgandi
Izoh (0)