2025-yilgi Klublar o‘rtasidagi Jahon chempionati chorak finalida “Real Madrid” va “Borussiya Dortmund” jamoalari to‘qnash kelishdi. AQShning Ruterford shahrida joylashgan “MetLife” stadionida bo‘lib o‘tgan bellashuvda madridliklar 3:2 hisobida g‘alaba qozonib, yarim final yo‘llanmasini qo‘lga kiritdi.
“Real Madrid” o‘yinni faol boshlab, 10-daqiqada hisobni ochdi. Arda Gyulerning aniq uzatmasidan so‘ng Gonsalo Garsiya raqib darvozasini ishg‘ol etdi. Oradan 10 daqiqa o‘tib, Fran Garsiya ispan klubining o‘yindagi ikkinchi goli muallifiga aylandi — 2:0.
Ikkinchi bo‘limda “Borussiya” hujumga o‘tdi. Ular bir necha xavfli vaziyatlar yaratgan bo‘lsa-da, ko‘p urinishlar samarasiz yakunlandi. O‘yinning asosiy vaqtiga qo‘shib berilgan daqiqalarda golga boy sahnalar kuzatildi. Xususan, 90+3-daqiqada Maksimilian Bayer hisobni 2:1 ko‘rinishiga keltirdi. Biroq oradan bir daqiqa o‘tmay, Kilian Mbappe javob golini kiritdi — 3:1.
Uchrashuv yakunida yana bir dramatik lahza yuz berdi. 90+5-daqiqada Din Xeysen o‘z jarima maydonchasida qoida buzib, to‘g‘ridan-to‘g‘ri qizil kartochka oldi. Natijada “Borussiya” penalti ishladi va Serju Girassi 90+8-daqiqada 11 metrlik zarbani golga aylantirdi — 3:2.
Shu tariqa “Real Madrid” yarim finalga yo‘l oldi, “Borussiya Dortmund” esa turnirni chorak finalda tark etdi.
Klublar o‘rtasidagi Jahon chempionati
1/8 final bosqichi
6-iyul, yakshanba
“Real Madrid” — “Borussiya Dortmund” 3:2
Gollar: 1:0 — Gonsalo Garsiya (10), 2:0 — Fermin Garsiya (20), 2:1 — Bayer (90+3), 3:1 — Mbappe (90+4), 3:2 — Girassi (90+8, pen).
Izoh (0)