“Real Madrid” Zinedin Ziddanni qaytarish masalasini ko‘rib chiqmoqda

Fransiyalik mutaxassis Zinedin Zidan uchinchi marta “Real” boshqaruviga tayinlanishi mumkin.

Fransiyaning Foot Mercato nashri xabariga ko‘ra, Madrid klubi Zidan bilan muzokaralar olib bormoqda. Karlo Anchelotti ketadigan bo‘lsa, fransiyalik mutaxassis “Real”ga qaytishi mumkin.

Ayni vaqtda Anchelottining Madrid klubidagi kelajagi noma’lum bo‘lib turibdi. Mutaxassisning klub bilan amaldagi shartnomasi 2024-yilning yoziga qadar mo‘ljallangan. Avvalroq Karloga Braziliya terma jamoasidan qiziqish borligi xabar qilingandi.

Ushbu masala borasida turli manbalar har xil xabar tarqatmoqda. Zidan “Real”ga qaytish istagida emas, uning uchun asosiy maqsad “Yuventus” bo‘lib turibdi, deb xabar qilgan RMC Sport.

Relevo versiyasiga ko‘ra, “qaymoqranglilar” Anchelottiga ishonch bilan qaramayapti.

Zidan bunga qadar murabbiy sifatida “Real”da ikkita davrni o‘tkazgan (2016—2018 va 2019—2021-yillar). Ularda mutaxassis klub bilan uch marta Chempionlar Ligasi g‘olibi bo‘lgan, ikki martadan La Liga, Ispaniya Superkubogi, UEFA Superkubogi va klublar o‘rtasidagi JCH bosh sovriniga ega chiqqan.