Klublar o‘rtasidagi Jahon chempionatining 1/8 final bosqichi doirasidagi navbatdagi bahs yakuniga yetdi. AQShning Mayami shahrida joylashgan “Hard Rock” stadionida Germaniyaning “Bavariya” jamoasi Braziliyaning “Flamengo” klubiga qarshi maydonga tushdi va myunxenliklar 4:2 hisobida zafar quchdi.
Uchrashuvning 6-daqiqasidayoq “Flamengo” yarim himoyachisi Erik Pulgar o‘z darvozasini ishg‘ol qilib qo‘ydi. Oradan uch daqiqa o‘tib, “Bavariya” hujumchisi Harri Keyn hisobni 2:0 ko‘rinishiga olib keldi.
33-daqiqada braziliyalik yarim himoyachi Jerson hisobni qisqartirdi — 2:1. Biroq 41-daqiqada Leon Goretskaning jarima maydonchasi tashqarisidan yo‘llagan zarbasi myunxenliklarning ustunligini yana oshirdi.
Ikkinchi bo‘limda “Flamengo” yana kurashga qaytishga urinib ko‘rdi. 55-daqiqada Jorjinyo penalti zarbasini aniq amalga oshirib, hisobni 3:2 ko‘rinishiga olib keldi. Biroq 73-daqiqada Harri Keyn ikkinchi bor raqib darvozasini ishg‘ol qilib, o‘yinda dubl qayd etdi va yakuniy natijani belgiladi — 4:2.
Mazkur g‘alaba evaziga “Bavariya” chorak final yo‘llanmasini qo‘lga kiritdi va ushbu bosqichda Parijning “PSJ” klubi bilan kuch sinashadi.
Klublar o‘rtasidagi Jahon chempionati
1/8 final
29-iyun, yakshanba
“Flamengo” — “Bavariya” 2:4
Gollar: 0:1 — Pulgar (6, avtogol), 0:2 — Harri Keyn (9), 1:2 — Jerson (33), 1:3 — Goretska (41), 2:3 — Jorjinyo (55, penalti), 2:4 — Harri Keyn (73)
Izoh (0)