Shanxayda sun’iy intellekt asosida yaratilgan ilk to‘liq metrajli animatsion film taqdim etildi. “A Better Tomorrow: Cyber Border” (“Porloq kelajak: kiber chegaralar”) deb nomlangan bu kartina eski jangari filmlar ruhida bo‘lsa-da, texnologik jihatdan butunlay yangi yondashuv asosida ishlangan.
Film Quantum Animation nomli raqamli algoritmlar yordamida qayta yaratilgan. Loyiha ustida bor-yo‘g‘i 30 nafar odam mehnat qilgan.
Quantum Animation texnologiyasi ssenariy yaratish, qahramon modellarini qurish, animatsiyalar harakatini ishlab chiqish, ovozlarni sun’iy tarzda sintez qilish va vizual effektlar berish kabi kinoga xos deyarli barcha texnik vazifalarni bajaradi. Dastur matn asosida mimika va harakatlarni tanlaydi, kadrlar esa bulutli serverlar orqali generatsiya qilinadi. Grafik tezlatkichlar va vizual rendering tizimi tufayli filmning yakuniy montaji bir kunda tayyor bo‘ladi. An’anaviy usulda bu jarayon bir necha yil talab qilgan bo‘lardi.
Ushbu tashabbus doirasida Xitoyda kung-fu haqidagi 100 ta klassik film raqamlashtirilib, zamonaviy formatda qayta ishlanadi. Bunda sun’iy ko‘rish texnologiyasi qo‘llaniladi: u har bir kadrni shovqin va xiraliklardan tozalaydi, ranglarni tiklaydi, ovozni qayta ishlaydi. Neyrotarmoq klassik filmlarning atmosferasini yo‘qotmasdan ularni bugungi kino standartlarga moslashtirishga harakat qiladi.
Loyiha mualliflarining fikricha, bu tashabbus kung-fu janriga hayot baxsh etadigan yangi media-ekotizim yaratishga xizmat qiladi. Klassik filmlar interaktiv formatlarda — o‘yinlar, anime, seriallar ko‘rinishida qayta “tiriladi”.
Bu texnologiyalar ijodkorlikning o‘rnini egallash uchun emas, balki unga yordam berish va texnik yukni yengillashtirish uchun joriy etilmoqda. Sun’iy intellekt har qanday g‘oyaning tez va samarali shakllanishiga ko‘maklashadi.
Yosh mutaxassislarni tayyorlash maqsadida Shanxayda maxsus ilmiy markaz ham tashkil etilgan. Talabalar bu yerda generativ modellarni kino sohasida qanday qo‘llashni o‘rganadi.
Izoh (0)