Bahrayn va Buyuk Britaniya 19-iyun kuni valiahd shahzoda Salmon bin Hamad Al-Xalifaning Londonga rasmiy tashrifi chog‘ida ikkita yirik kelishuvga erishdi. Bu haqda Arab News xabar berdi.
Buyuk Britaniya bosh vaziri Kir Starmer bilan muzokaralar uchun tashrif chog‘ida valiahd shahzoda va mamlakat vakili strategik investitsiyalar va hamkorlik bo‘yicha SIP2 deb nomlangan shartnoma imzolagan. Bitimda ikki mamlakat investitsiya shartlarini yangilagan.
Kelishuv Bahrayn xususiy sektori tomonidan Buyuk Britaniyaning asosiy tarmoqlariga, jumladan, moliyaviy xizmatlar, texnologiya, ishlab chiqarish va dekarbonizatsiyaga 2 milliard funt sterling (2,7 milliard dollar) sarmoya kiritishni ko‘zda tutadi. Uni Bahrayn moliya vaziri Shayx Salmon bin Xalifa Al-Xalifa va Buyuk Britaniya moliya vaziri Reychel Rivz imzolagan.
Ikkinchi kelishuv Mudofaa sohasida hamkorlik to‘g‘risidagi bitim bo‘lib, u dengiz hamkorligi asosida davlatlar qurolli kuchlari o‘rtasidagi o‘zaro muvofiqlikni va qo‘shma tayyorgarlikni yaxshilashga qaratilgan. Uni mudofaa vazirlari, leytenant Gen, Abdulloh Al-Nuaymiy va Jon Xiliy rasmiylashtirgan.
Shahzoda Salmon Starmer bilan muzokaralar chog‘ida mamlakatlar o‘rtasidagi munosabatlar mustahkamligini yana bir bor tasdiqlagan. Uning so‘zlariga ko‘ra, qirol Hamad va qirol Charlz rahbarligida bu munosabatlar o‘sishda davom etmoqda.
Yetakchilar Buyuk Britaniya—Ko‘rfaz arab davlatlari hamkorlik kengashi o‘rtasida erkin savdo to‘g‘risidagi taklif etilayotgan bitimning borishini ko‘rib chiqgan. Valiahd shahzoda dekabr oyida ta’sischi davlatlar Bahrayn va AQSHning qo‘shma taklifiga binoan Buyuk Britaniyaning Xavfsizlik, integratsiya va farovonlikni har tomonlama ta’minlash to‘g‘risidagi bitimda to‘liq ishtirok etish qarorini olqishlagan.
Mintaqaviy va kengroq xalqaro voqealar shahzoda Salmon va Starmer o‘rtasidagi munozaralarda muhim o‘rin egallagan. Ular ikkalasi ham Isroil va Eron o‘rtasidagi so‘nggi harbiy harakatlarning kuchayishiga xavotir bildirgan. Ular mojaroni yumshatish va muloqotni qayta tiklashning shoshilinch zarurligi haqida kelishib olgan.
Shuningdek, ular G‘azoda zudlik bilan o‘t ochishni to‘xtatish, hududga to‘siqsiz gumanitar kirish va HAMAS tomonidan hali ham garovda ushlab turilgan barcha odamlarni ozod qilish bo‘yicha avvalgi chaqiriqlarni ko‘rib chiqqan.
Starmer Bahraynni 2026-yil yanvar oyidan boshlab ikki yillik muddatga BMT Xavfsizlik kengashining muvaqqat a’zosi etib saylangani bilan tabriklagan. Ikkala yetakchi ham shu munosabat bilan diplomatik sa’y-harakatlarni kuchaytirish uchun yaqindan hamkorlik qilishga kelishib olgan.
Izoh (0)