Turkmaniston prezidenti Serdar Berdimuhamedov 21—22-fevral kunlari rasmiy tashrif bilan Bahraynda bo‘lib, u yerda o‘tkazilgan tadbirlarda ishtirok etdi, Qirol Hamad bin Iso Al-Xalifa bilan uchrashdi va sovg‘alar almashdi. Bu haqda “Turkmenistan segodnya” nashri xabar bermoqda.
Berdimuhamedov Bahrayn Iqtisodiy taraqqiyot kengashiga tashrif buyurgan, unga qirollikning maket xaritasi ko‘rsatilgan hamda investitsiya loyihalari va hamkorlik imkoniyatlari haqida aytib berilgan.
Turkmaniston prezidenti Qirol Hamad bin Iso al-Xalifa bilan muzokaralarda ikki tomonlama hamkorlikni muhokama qilgan. Uchrashuv yakunlari bo‘yicha qo‘shma bayonot, shuningdek, madaniyat, taʼlim, dengiz transporti va metrologiya sohalarida hamkorlikka oid qator memorandum va bitimlar imzolangan.
Qirol Berdimuhamedovga Shayx Iso bin Salmon Al-Xalifa nomidagi birinchi darajali ordenni topshirgan – bu Bahrayn qirolligining oliy mukofotidir.
Shuningdek, rasmiy tadbirlar yakunida Turkmaniston prezidenti qirol otxonasiga olib borilib, u yerda unga ikkita arab oti sovg‘a qilingan. O‘z navbatida Serdar Berdimuhamedov Bahrayn Milliy muzeyiga turkman gilami va otasi Gurbanguli Berdimuhamedovning Axalteke otlari haqidagi kitobini sovg‘a qilgan.
Turkmaniston prezidenti bahraynlik hamkorlarni kelasi yilda biznes va sarmoyaviy forumlar o‘tkazishga hamda qirol Hamad bin Iso al-Xalifani tashrif buyurishga taklif qilgan.
Izoh (0)