AQSH prezidenti Donald Tramp Eronga hujum qilish rejasini maxfiy ravishda ma’qulladi, biroq Tehron yadro dasturidan voz kechishi ehtimolini hisobga olib, zarba berish to‘g‘risidagi yakuniy buyruqni hali bermadi. Bu haqda muhokamalar jarayonidan xabardor bo‘lgan uchta manbaga tayanib The Wall Street Journal xabar berdi.
Tramp AQSHning urushga aralashishi xavfi Eronni yadro quroli bo‘yicha talablarni bajarishga majbur qilishiga ishonmoqda. U Oq uyda harbiy qo‘mondonlar bilan uchrashuvdan so‘ng jurnalistlar bilan suhbatda bu boradagi harbiy yechim ehtimolini inkor etmagan.
Men yakuniy qaror qabul qilishni aynan so‘nggi soniyada amalga oshirishni yaxshi ko‘raman. Chunki hamma narsa o‘zgarib turadi, ayniqsa, urush paytida...
Aralashishni xohlamayman, lekin 20 yildan beri, balki undan ham ko‘proq vaqtdan buyon Eron yadro quroliga ega bo‘lmasligi kerakligini aytib kelmoqdaman. Buni uzoq vaqtdan beri ta’kidlab kelyapman va ular buni qo‘lga kiritishlariga bir necha hafta qolgan, deb o‘ylayman, degan Tramp.
Yaqinda AQSH prezidenti Erondan so‘zsiz taslim bo‘lishni talab qilgan edi. Bunga javoban Eron oliy rahnamosi Oyatulloh Ali Xomanaiy eronliklar chekinmasligini ma’lum qilgandi.
AQSHning har qanday harbiy aralashuvi, shubhasiz, ular uchun o‘rnini to‘ldirib bo‘lmaydigan zararga aylanadi, degan Xomanaiy.
U Eron hech kimning “da’vati”ga bo‘ysunmasligi, “majburiy urush”ga ham, “majburiy tinchlik”ka ham qat’iyat bilan qarshi turishini aytgan. 20-iyun kuni Eron va Fransiya, Buyuk Britaniya, Germaniya o‘rtasida yadroviy muzokaralar rejalashtirilgan. Yevropa davlatlari atom energiyasidan faqat tinchlik maqsadlarida foydalanishga qat’iy kafolat berishni so‘raydi.
Izoh (0)