Ijtimoiy tarmoqlarda xonanda Shoira Otabekova avtohalokatga uchragani aytilgan videolar tarqaldi. Qo‘shiqchi o‘z sahifasida mazkur xabarni tasdiqladi.
Viloyat IIB holat yuzasidan maʼlumot berdi. Unga ko‘ra, hodisa 19-iyun kuni soat 12:20 larda Qo‘rg‘ontepa tumani, “Xurobod” mahallasi hududidan o‘tgan D-138 avtomobil yo‘lining 42-kilometrida sodir bo‘lgan.
1980-yilda tug‘ilgan Sh.O. o‘zining BYD song plus rusumli transport vositasida Xonobod shahar yo‘nalishi bo‘ylab boshqarib ketayotib, rul boshqaruvini yo‘qotishi oqibatida yo‘l chetidagi chegara sim to‘sig‘iga borib urilgan.
Ushbu yo‘l-transport hodisasi oqibatida tan jarohati olganlar yo‘q. Transport vositasi texnik shikastlangan. Mazkur holat yuzasidan hozirda Qo‘rg‘ontepa tumani Ichki ishlar bo‘limi YHXG xodimlari tomonidan surishtiruv ishlari olib borilmoqda.
“Men avtohalokatga uchradim. Qarama-qarshi yo‘nalishga chiqib, siqqan odam qochib ketdi. O‘zimga hech nima bo‘lmadi. Ko‘ramiz endi buni ortida kim turganini”, deydi xonanda.
Bundan avval aktrisa Sabrina Jabborova xonanda Ozoda Nursaidovaning “Dilbarim” klipini suratga olish jarayonida avtohalokatga uchrab, nogiron bo‘lib qolgani xabar qilingan edi. U o‘z chiqishida voqeaga sababchi bo‘lganlar tomonidan unga hech qanday yordam ko‘rsatilmayotgani, o‘z holiga tashlab qo‘yilganini maʼlum qilgan. Shundan so‘ng klipni suratga olish jamoasi vakillari, xonanda va uning maʼmuri aktrisaga yetarlicha ko‘mak berilayotganini aytib chiqishdi. Keyinroq Ozoda Nursaidova masaladan to‘liq xabari yo‘qligini aytib, Sabrinadan uzr so‘radi.
Izoh (0)